ಶಂಕರ್ ಪ್ರೊಡಕ್ಷನ್ಸ್ ಲಾಂಛನದಲ್ಲಿ ಶಂಕರ್‌ಗೌಡ ಹಾಗೂ ಸ್ಯಾಂಡಿ ಅವರು ನಿರ್ಮಿಸುತ್ತಿರುವ ‘ಬಾಯ್ಸ್’ ಚಿತ್ರಕ್ಕೆ ಈ ತಿಂಗಳ 26ರಿಂದ ಗೋವಾದಲ್ಲಿ ಹತ್ತುದಿನಗಳ ಕಾಲ ಚಿತ್ರೀಕರಣ ನಡೆಯಲಿದೆ.

ಅಂಡರ್‌ವಾಟರ್ ಫ಼ೈಟ್ ಹಾಗೂ ಒಂದು ಹಾಡನ್ನು ಗೋವಾದಲ್ಲಿ ಚಿತ್ರಿಸಿಕೊಳ್ಳಲಾಗುವುದು ಎಂದು ನಿರ್ದೇಶಕ ಶಂಕರ್‌ಗೌಡ ತಿಳಿಸಿದ್ದಾರೆ. ‘ಬಾಯ್ಸ್’ ಶಂಕರ್‌ಗೌಡ ನಿರ್ದೇಶನದ ಪ್ರಥಮ ಚಿತ್ರ.

ಮಾಲಾಶ್ರೀ ಅವರು ಪ್ರಧಾನ ಪಾತ್ರದಲ್ಲಿ ಅಭಿನಯಿಸುತ್ತಿರುವ ಈ ಚಿತ್ರದ ತಾರಾಬಳಗದಲ್ಲಿ ರವಿಶಂಕರ್, ತಬಲನಾಣಿ, ಶ್ರೀನಿವಾಸಮೂರ್ತಿ, ವಿಜಯಸಿಂಹ, ಅಖಿಲಾಕಿಶೋರ್, ರಾಣಿಪಾಟೀಲ್, ಕಾಜಲ್, ಗ್ಯಾದಿ, ಡ್ಯಾನಿ, ಮಂಜುನಾಥ್ ಪವಾರ್, ಮನೋಜ್, ರಾಜೀವ್, ಕಿಮಾಯ್ ಮುಂತಾದವರಿದ್ದಾರೆ.

ರಾಜೇಶ್ ಛಾಯಾಗ್ರಾಹಕರಾಗಿರುವ ಈ ಚಿತ್ರಕ್ಕೆ ಅರ್ಜುನ್‌ಜನ್ಯ ಸಂಗೀತ ನೀಡುತ್ತಿದ್ದಾರೆ. ಶ್ರೀ ಸಂಕಲನ, ಆನಂದ್ ಕಲಾನಿರ್ದೇಶನ, ಗಣೇಶ್, ತ್ರಿಭುವನ್ ನೃತ್ಯ ನಿರ್ದೇಶನ, ಥ್ರಿಲ್ಲರ್‌ಮಂಜು, ಪೀಟರ್ ಅವರ ಸಾಹಸ ನಿರ್ದೇಶನವಿರುವ ‘ಬಾಯ್ಸ್’ ಚಿತ್ರಕ್ಕೆ ಶಕ್ತಿ ಸಂಭಾಷಣೆ ಬರೆದಿದ್ದಾರೆ.