ನೂಪುರ ಭ್ರಮರಿ ಪ್ರತಿಷ್ಠಾನ ಈಗಾಗಲೇ ನೃತ್ಯ ಕ್ಷೇತ್ರದಲ್ಲಿ ಹೆಸರು ಮಾಡಿರುವ ಸಂಸ್ಥೆ. ಸಮಾನ ಮನಸ್ಕರ ಜೊತೆಗೂಡಿ ಈ ಸಂಸ್ಥೆ, ನೃತ್ಯಸಂಸ್ಕೃತಿಗೆ ಸಂಬಂಧಿಸಿದ ವಸ್ತುನಿಷ್ಠ ಅಧ್ಯಯನ, ಕ್ರಮಬದ್ಧ ಸಂಶೋಧನಾಕ್ರಮ ಮತ್ತು ಅವಕಾಶಗಳಿಗೆ ಒತ್ತು ನೀಡಲು 'ನೃತ್ಯ ಸಂಶೋಧಕರ ಒಕ್ಕೂಟ' ಸ್ಥಾಪಿಸಿದೆ. ಈ ಒಕ್ಕೂಟ ಕೇವಲ ಸಂಶೋಧನೆಗೆ ಮೀಸಲಾದ ಸಂಸ್ಥೆ.  ನಾಲ್ಕು ತಿಂಗಳ ಹಿಂದೆ, ಫೆಬ್ರವರಿ ೨೦ ರಂದು ಬೆಂಗಳೂರಿನ ನಯನ ಸಭಾಂಗಣದಲ್ಲಿ ಈ ಸಂಸ್ಥೆ ವಿದ್ಯುಕ್ತವಾಗಿ ಉದ್ಘಾಟನೆಗೊಂಡಿದೆ. 

ನೃತ್ಯ ಕ್ಷೇತ್ರದಲ್ಲ್ಲಿನ ಸಮಸ್ಯೆಗಳು, ಸಂಶೋಧನಾ ಕ್ಷೇತ್ರದ ಸವಾಲುಗಳು, ಜವಾಬ್ದಾರಿಗಳನ್ನು ಕಂಡುಕೊಂಡು ಅದಕ್ಕೆ ಸೂಕ್ತ ಪರಿಹಾರೋಪಾಯಗಳನ್ನು, ಕರ್ತವ್ಯಗಳನ್ನು ರೂಪಿಸಿಕೊಳ್ಳುವ ಯೋಜನೆಗಾಗಿ ಮೈತಳೆದ ಒಂದಷ್ಟು ವರುಷದ ಚಿಂತನ-ಮಂಥನದ ಫಲವೇ ಈ ಒಕ್ಕೂಟ.  ಬೆನ್ನತ್ತಿ ಬಂದ ಬೇಗುದಿ, ಅನವರತ ಆತಂಕ, ಗಡಿಬಿಡಿಯ ಓಡಾಟ, ಸಮಯದ ಹೊಂದಾಣಿಕೆಯಲ್ಲಾಗುವ ಸಂದಿಗ್ಥತೆ, ಅಳುಕು, ಅಳು -ನಗು..ಹೀಗೆ ಸಂಘಟನೆಯ ಹಿಂದಿನ ಸಂಕಟಗಳಿಂದಾಚೆಗೂ ಧನ್ಯತೆಯನ್ನೂ; ಕೃತಕೃತ್ಯತೆಯ ನೆನವರಿಕೆಗಳನ್ನು, ಪರಸ್ಪರ ಕೈಹಿಡಿದು ಮುನ್ನಡೆವ ದಾರಿಯನ್ನು, ಸಾಧಿಸುವ ಛಲವನ್ನು, ಕಣ್ಣಂಚಿನಲ್ಲಿ ಆನಂದದ ಹನಿ ನೀರನ್ನು ಇತ್ತದ್ದು ಕರ್ನಾಟಕದ ಮೊದಲ ನೃತ್ಯ ಸಂಶೋಧನಾ ವಿಚಾರಸಂಕಿರಣ. ನಾಲ್ಕು ಪ್ರಬುದ್ಧ ಸಂಶೋಧನಾ ಪ್ರಬಂಧವಾಚನ, ೩ ವಿಶೇಷ ಉಪನ್ಯಾಸ, ವಿದ್ವಾಂಸರೊಂದಿಗೆ ಸಂವಾದ, ವಿಮರ್ಶಾ ಪ್ರಶಸ್ತಿ, ಹಿರಿಯ ಸಂಶೋಧಕರಿಂದ ಆಶೀರ್ವಾದದೊಂದಿಗಿನ ಬೆಂಬಲ, ಚಿಂತನ-ಮಂಥನ, ಸಂಶೋಧನಾಧಾರಿತ ನೃತ್ಯ ಕಾರ್ಯಕ್ರಮ ಮತ್ತು ಎಲ್ಲಾ ಪ್ರಯತ್ನಕ್ಕೂ ಭವಿತವ್ಯದಲ್ಲಿ ಸಿದ್ಧ ಅಡಿಪಾಯ ಮೂಡುವಂತೆ ಒಲುಮೆಯ ಗೆಳೆಯರ ಸದಾಶಯದೊಂದಿಗೆ ಪ್ರಾರಂಭವಾದ ನೃತ್ಯ ಸಂಶೋಧಕರ ಒಕ್ಕೂಟವೆಂಬ ಸಂಶೋಧನೆ-ನೃತ್ಯದ ತಂತುಗಳನ್ನು ಬೆಸೆಯುವ ಕೆಲಸ. ಒಟ್ಟಿನಲ್ಲಿ ಇಡೀ ದಿನದ ಎಲ್ಲಾ ವಿಚಾರ-ವಿಶೇಷಗಳನ್ನು ಬರೆಯಹೊರಟರೆ ಪುಟಗಟ್ಟಲೆ ಸಾಲದು.

ಒಕ್ಕೂಟದ ಆಶಯಗಳು

ಒಕ್ಕೂಟಕ್ಕೆ ಯಾವುದೇ ಭಾಷಾ, ಭೌಗೋಳಿಕ ಮಿತಿಗಳಿರುವುದಿಲ್ಲ. ಕಾರ್ಯವಾಪ್ತಿ ವಿಸ್ತಾರವಾಗಿರುತ್ತದೆ. ನವೀನ, ಸ್ವಸಂಶೋಧಿತ ಸಂಶೋಧನೆಗಳನ್ನು ಸ್ವಾಗತಿಸುವುದು, ಅವಕಾಶ ನೀಡುವುದು ಧ್ಯೇಯಗಳಲ್ಲೊಂದು. ಚರ್ವಿತ ಚರ್ವಣವೆನಿಸುವ ಯಾವುದೇ ವಿಷಯ ಪ್ರಸ್ತುತಿಗೆ ಅವಕಾಶವಿಲ್ಲ. · ನೃತ್ಯಕ್ಕೆ ಸಂಬಂಧಿಸಿದಂತೆ ಸಂಶೋಧಕರನ್ನು ಒಗ್ಗೂಡಿಸುವುದು ಮತ್ತು ಪರಸ್ಪರ ಸೌಹಾರ್ದ ಬಾಂಧವ್ಯದ ನಿರೂಪಣೆ ಮುಖ್ಯ ಉದ್ದೇಶ. ಈ ನೆಲೆಯಲ್ಲಿ ಈ ಒಕ್ಕೂಟದ್ದು ಶೋಧದ, ಸಂಚಯದ ಶೈಕ್ಷಣಿಕ ಹಾದಿ. · ಯುವ ಸಂಶೋಧಕರು ಮತ್ತು ಯುವಜನತೆಯಲ್ಲಿ ಸೂಕ್ತ ಸಂಶೋಧನಾ ದಿಕ್ಕು, ಮಾದರಿಗಳ ನಿರ್ಮಿತಿಯು ಒಕ್ಕೂಟದ ಪ್ರಧಾನ ಲಕ್ಷ್ಯ.

ಆದ್ದರಿಂದ ಹಿರಿತನಕ್ಕೆ ಗೌರವವಿರುವುದಾದರೂ ಅರಿವಿನ ಹಿರಿತನವೇ ಪ್ರಧಾನವಾದುದು. ಪದವಿ/ಪ್ರತಿಷ್ಠೆ/ವಯಸ್ಸಿನ ಅಡೆತಡೆಗಳಿಲ್ಲದೆ ಕಾಲಾನುಕಾಲವಾಗಿ ಸಂಶೋಧನೆಗೆ ಸಂಬಂಧಿಸಿದಂತೆ ಮುನ್ನಡೆಯುವುದು ಉದ್ದೇಶ. · ಯಾವುದೇ ರಾಜಕೀಯ, ಮುಚ್ಚುಮರೆ, ಕಪೋಲಕಲ್ಪಿತ, ಗಾಸಿಪ್‌ನಂತಹ ಸುದ್ದಿ, ವಿಷಯ ವಿಶ್ಲೇಷಣೆಗಳಿಗೆ ಅವಕಾಶ ಕೊಡದೆ ಮುಕ್ತ, ಸಸ್ನೇಹಪೂರ್ಣ, ಕೌಟುಂಬಿಕ ಮನಸ್ಥಿತಿ ಮತ್ತು ನಡವಳಿಕೆಗಳನ್ನು ಒಕ್ಕೂಟದಲ್ಲಿ ಕಾಪಾಡಿಕೊಳ್ಳುವುದು. · ಪ್ರಯೋಗ ಮತ್ತು ಸಿದ್ಧಾಂತಗಳ ನಡುವಿನ ಸಂಬಂಧವನ್ನು ಸ್ಪಷ್ಟಪಡಿಸುವಂತಹ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳುವುದು. · ನೃತ್ಯಕ್ಕೆ ಪೂರಕವಾಗುವ ಸಂಗೀತ ಮತ್ತು ಇತರ ಲಲಿತ ಕಲೆಗಳ ಸಂಶೋಧನೆಗೆ ಸಂಬಂಧಿಸಿದ ಅಗತ್ಯ ಅನುಕೂಲಗಳನ್ನು ಕಲ್ಪಿಸುವುದು; ಮತ್ತು ನಿರ್ದಿಷ್ಟ ಮಾನದಂಡ, ದಿಕ್ಕನ್ನು ಕಂಡುಕೊಳ್ಳುವುದು. · ವಾರ್ಷಿಕವಾಗಿ ಮತ್ತು ಸಂದರ್ಭೋಚಿತವಾದ ಸಭೆ-ಸಮಾರಂಭಗಳನ್ನು ನಡೆಸುವುದರೊಂದಿಗೆ ಸಂಪನ್ಮೂಲ ವ್ಯಕ್ತಿಗಳನ್ನು ಯೋಜಿಸಿಕೊಂಡು ಸಂಶೋಧನೆಯ ವಿವಿಧ ದಿಕ್ಕುಗಳಿಗೆ ಸಂಬಂಧಿಸಿದ ಹಲವು ಬಗೆಯ ಉಪನ್ಯಾಸ, ಕಮ್ಮಟ, ವಿಚಾರಸಂಕಿರಣ, ಕಾರ್ಯಾಗಾರ, ಪ್ರಾತ್ಯಕ್ಷಿಕೆ ಇತ್ಯಾದಿ ಕಾರ್ಯಕ್ರಮಗಳನ್ನು ಯಥೋಚಿತವಾಗಿ ನಿರ್ಧರಿತ ವಾರ್ಷಿಕ ನಿಯಮಾವಳಿಗಳನುಸಾರವಾಗಿ ನಡೆಸಿಕೊಂಡು ಬರುವುದು. ·

ಪ್ರತಿವರ್ಷ ಮಹಾಶಿವರಾತ್ರಿಯ ಆಸುಪಾಸಿನ ದಿನಗಳಲ್ಲಿ ಆಯೋಜಿಸಲಾಗುವ ವಿಚಾರಸಂಕಿರಣದಲ್ಲಿ ಆದಷ್ಟು ಹೊಸ ಸಂಶೋಧಕರಿಗೆ, ಸಂಶೋಧನೆಗೆ, ಸಂಶೋಧನಾಧರಿತ ನೃತ್ಯಪ್ರಸ್ತುತಿ, ಪ್ರಾತ್ಯಕ್ಷಿಕೆಗಳಿಗೆ ಅವಕಾಶ ನೀಡಲಾಗುತ್ತದೆ. ಈ ಸಂದರ್ಭದಲ್ಲಿ ಮಂಡನೆಯಾದ ಸಂಶೋಧನಾ ಪ್ರಬಂಧಗಳನ್ನು ಸಂಕಲಿಸಿ ಸಂಶೋಧನಾ ನಿಯತಕಾಲಿಕೆಯನ್ನು ಯಥೋಚಿತವಾಗಿ ಪ್ರಕಟಿಸುವುದು ಮತ್ತು ಸೂಕ್ತ ಮಾದರಿಯಲ್ಲಿ ವೀಡಿಯೋ ಸಿಡಿ ರೂಪದಲ್ಲಿ ದಾಖಲಿಸುವುದು. · ಅಸೋಸಿಯೇಷನ್ ಸದಸ್ಯರಾಗಲು ಸದಸ್ಯಧನ ೧೫೦೦/- ರೂ. ಸಮಯದ ಅನಿವಾರ್ಯತೆಯನ್ನು ಅವಲಂಬಿಸಿ ವಾರ್ಷಿಕವಾಗಿ ಮೊತ್ತವನ್ನು ಹೆಚ್ಚು ಅಥವಾ ಕಡಿಮೆ ಮಾಡುವುದು ಪ್ರಧಾನ ಸಮಿತಿಯ ಸರ್ವ ಸದಸ್ಯರ ಒಮ್ಮತದ ನಿರ್ಣಯಕ್ಕೆ ಬಿಟ್ಟದ್ದು. ಸದಸ್ಯರಿಗೆ ಕಾಲಾನುಕೂಲ ಮತ್ತು ಕಾರ್ಯಕ್ರಮದ ಸ್ವರೂಪದನ್ವಯ ವಿಶೇಷ ಸೌಲಭ್ಯ ಮತು ರಿಯಾಯ್ತಿಗಳಿರುತ್ತವೆ