February 15, 2015

ಕುಟುಂಬದ ಒಬ್ಬರಿಗೆ ಮಾತ್ರ ಜನಧನ ಯೋಜನೆಯಡಿಡಿ 5000 ರೂ. ಓ.ಡಿ.

ನವದೆಹಲಿ : ಪ್ರಧಾನಿ ನರೇಂದ್ರ ಮೋದಿ ಅವರ ಮಹತ್ವಾಕಾಂಕ್ಷಿ ಜನ-ಧನ ಯೋಜನೆಯಡಿ ಬ್ಯಾಂಕ್‌ ಖಾತೆ ತೆರೆದವರಿಗೆ ಓವರ್‌ ಡ್ರಾಫ್ಟ್ (ಓ.ಡಿ.) ನೀಡುವ ಸೌಲಭ್ಯವನ್ನು ಕೇಂದ್ರ ಹಣಕಾಸು ಸಚಿವಾಲಯ ಆರಂಭಿಸಿದೆ. ಆದರೆ ಇದಕ್ಕೆ ಹಲವಾರು ಷರತ್ತುಗಳನ್ನೂ ವಿಧಿಸಲಾಗಿದೆ.

ಕುಟುಂಬದಲ್ಲಿ ಎಷ್ಟೇ ಮಂದಿ ಜನ-ಧನದಡಿ ಬ್ಯಾಂಕ್‌ ಖಾತೆ ಮಾಡಿಸಿಕೊಂಡಿದ್ದರೂ ಆ ಪೈಕಿ ಆದಾಯ ಗಳಿಸುತ್ತಿರುವ ಒಬ್ಬ ವ್ಯಕ್ತಿಗೆ ಮಾತ್ರ 5 ಸಾವಿರ ರೂ.ವರೆಗೆ ಓ.ಡಿ. ಸೌಲಭ್ಯ ಸಿಗುತ್ತದೆ. ಅದರಲ್ಲೂ ಮಹಿಳೆಯರಿಗೆ ಆದ್ಯತೆ ನೀಡಲಾಗುತ್ತದೆ.

ಮೂರು ವರ್ಷಗಳ ಅವಧಿಗೆ ಈ ಓ.ಡಿ. ನೀಡಲಾಗುತ್ತದೆ. ಬ್ಯಾಂಕ್‌ ಖಾತೆಯಲ್ಲಿರುವ ಮಾಸಿಕ ಸರಾಸರಿ ಬಾಕಿ ಮೊತ್ತದ ನಾಲ್ಕು ಪಟ್ಟು ಅಥವಾ ಕಳೆದ ಆರು ತಿಂಗಳ ಅವಧಿಯಲ್ಲಿ ಖಾತೆಗೆ ಜಮೆಯಾಗಿರುವ ಹಣದ ಸರಾಸರಿಯ ಶೇ.50ರಷ್ಟು ಮಾತ್ರ ಕೊಡಲಾಗುತ್ತದೆ. ಆದರೆ 5000 ರೂ. ಮಿತಿ ನಿಗದಿಪಡಿಸಲಾಗಿದೆ. ಬ್ಯಾಂಕುಗಳು ಈ ಓ.ಡಿ. ಮೊತ್ತಕ್ಕೆ ಮೂಲ ದರ (ಶೇ.10ರಷ್ಟಿದೆ)ದ ಮೇಲೆ ಶೇ.2ರವರೆಗೂ ಬಡ್ಡಿ ವಿಧಿಸಬಹುದಾಗಿದೆ ಎಂದು ಹಣಕಾಸು ಸಚಿವಾಲಯ ಮಾರ್ಗಸೂಚಿಗಳನ್ನು ಬಿಡುಗಡೆ ಮಾಡಿದೆ.

ಓ.ಡಿ. ಸೌಲಭ್ಯ ಪಡೆಯುವ ಗ್ರಾಹಕರು ಕಳೆದ ಆರು ತಿಂಗಳಿನಿಂದ ಖಾತೆಯಲ್ಲಿ ವ್ಯವಹಾರ ನಡೆಸಿರಬೇಕು. ಅಡುಗೆ ಅನಿಲ ನೇರ ಸಬ್ಸಿಡಿ ಯೋಜನೆ ಅಥವಾ ಇನ್ನಿತರೆ ಮೂಲಗಳಿಂದ ಖಾತೆಗೆ ಹಣ ಜಮೆಯಾಗಿರಬೇಕು. ಅಲ್ಲದೆ ಓ.ಡಿ. ಪಡೆಯುವ ಖಾತೆಗಳು ಆಧಾರ್‌ ಜತೆ ಜೋಡಣೆಯಾಗಿರಬೇಕು ಎಂಬ ಷರತ್ತುಗಳನ್ನು ವಿಧಿಸಲಾಗಿದೆ.