ಬೀಜಿಂಗ್ : ಭಾರತ ಮತ್ತು ಅಮೆರಿಕ ನಡುವಿನ ಸಂಬಂಧ ತೋರಿಕೆಯಾಗಿದ್ದು, ಅದರಲ್ಲಿ ಹುರುಳಿಲ್ಲ ಎಂದು ಚೀನಾದ ಕ್ಸಿನ್ ಹುವಾ ನ್ಯೂಸ್ ಏಜೆನ್ಸಿ ಲೇವಡಿ ಮಾಡಿದೆ.
ಅಮೆರಿಕ ಅಧ್ಯಕ್ಷ ಬರಾಕ್ ಒಬಾಮಾ ಭಾರತ ಭೇಟಿ ಎರಡು ದೇಶಗಳ ನಡುವಿನ ಹುಸಿ ಸಂಬಂಧದ ಸಂಕೇತವಾಗಿದೆ ಎಂದು ಅದು ವ್ಯಂಗ್ಯವಾಡಿದೆ.
ಭಾರತ ಮತ್ತು ಅಮೆರಿಕ ನಡುವಿನ ಅಣು ಒಪ್ಪಂದಕ್ಕೆ ಸಹಿಹಾಕಲಾಗಿದ್ದು, ಅಮೆರಿಕನ್ ಕಂಪನಿಗಳು ಭಾರತಕ್ಕೆ ನಾಗರಿಕ ಪರಮಾಣು ತಂತ್ರಜ್ಞಾನವನ್ನು ಸರಬರಾಜು ಮಾಡಲಿದೆ ಎಂದು ಭಾರತ ಮತ್ತು ಅಮೆರಿಕ ಜಂಟಿ ಪತ್ರಿಕಾಗೋಷ್ಠಿಯಲ್ಲಿ ಘೋಷಿಸಲಾಗಿತ್ತು.
ಒಬಾಮಾ ಭೇಟಿಯಿಂದ ಭಾರತಕ್ಕೆ ವ್ಯವಹಾರಿಕವಾಗಿ ಲಾಭವಾಗಿದೆ. ಎರಡೂ ದೇಶಗಳ ಹವಾಮಾನ ವೈಪರೀತ್ಯ, ಕೃಷಿಯಲ್ಲಿ ಭಾರೀ ವ್ಯತ್ಯಾಸಗಳಿವೆ. ಇದೀಗ ಉಭಯ ದೇಶಗಳು ಸ್ನೇಹ ಹಸ್ತ ಚಾಚಿರೋದು ವೈಚಿತ್ರ್ಯವಾಗಿದೆ ಎಂದು ಕ್ಸಿನ್ ಹುವಾ ಆರೋಪಿಸಿದೆ.
ಅಷ್ಟೇ ಅಲ್ಲ ಎರಡು ದೇಶಗಳ ಒಪ್ಪಂದ ಚೀನಾದ ಮೇಲೆ ಯಾವುದೇ ಪರಿಣಾಮ ಬೀರಿಲ್ಲ ಎಂದು ಹೇಳಿದ್ದು, ಅಮೆರಿಕ ಮತ್ತು ಭಾರತ ನಡುವಿನ ರಾಯಭಾರಿ ವಿವಾದವನ್ನು ಕೆದಕಿ ಹೇಳುವ ಮೂಲಕ ಭಾರತ ಮತ್ತು ಅಮೆರಿಕ ನಡುವಿನ ಸ್ನೇಹ ತೋರಿಕೆಯದ್ದಾಗಿದೆ ಎಂದು ವರದಿ ಮಾಡಿದೆ.