ನವದೆಹಲಿ : ಗಡಿಯಲ್ಲಿ ಸದಾ ಕ್ಯತೆತೆಗೆಯುವ ಚೀನಾ ಸೈನಿಕರು, ವಾಸ್ತವ ನಿಯಂತ್ರಣ ರೇಖೆಯನ್ನು ದಾಟಿ ಭಾರತದ ಪ್ರದೇಶಕ್ಕೆ ಬಂದು ಭಾರತೀಯ ಸೈನಿಕರ ಜತೆ ವಾಗ್ವಾದ ನಡೆಸಿದ್ದಾರೆ ಎಂದು ತಿಳಿದುಬಂದಿದೆ.
ಈ ವಿಚಾರ ತಡವಾಗಿ ಬೆಳಕಿಗೆ ಬಂದಿದ್ದು, ಚೀನಾ ಸೇನೆಯ ಕ್ಯಾತೆ ನಡುವೆಯೂ ತಾಳ್ಮೆ ಕಳೆದುಕೊಳ್ಳದ ಭಾರತೀಯ ಸೈನಿಕರು, ಚೀನಾ ಸೈನಿಕರನ್ನು ಹಿಮ್ಮೆಟ್ಟಿಸಿರುವ ಕುರಿತು ವಿಡಿಯೋ ಚಿತ್ರಣವೊಂದು ಹೊರಬಿದ್ದಿದೆ.
ವಿಡಿಯೋ ಚಿತ್ರಣದಲ್ಲಿರುವ ಪ್ರಕಾರ ಚೀನಾ ಸೈನಿಕರು ಗಡಿ ಗುರುತಿಸುವ ಪ್ರದೇಶದಲ್ಲಿಟ್ಟುರುವ ಕಲ್ಲುಗಳನ್ನು ತೆಗೆದು ಹಾಕುತ್ತಿರುವುದು ಕಂಡುಬಂದಿದೆ. ಈ ವೇಳೆ ಸ್ಥಳಕ್ಕೆ ಧಾವಿಸಿದ ಭಾರತೀಯ ಯೋಧರು, ಇದು ಭಾರತಕ್ಕೆ ಸೇರಿದ ಪ್ರದೇಶವಾಗಿದ್ದು, ಹಿಂದಕ್ಕೆ ಸರಿಯುವಂತೆ ಸೂಚಿಸಿದ್ದಾರೆ. ಇದಕ್ಕೆ ಚೀನಾ ಸೈನಿಕರು ಒಪ್ಪದಿದ್ದಾಗ, ಭಾರತೀಯ ಸೈನಿಕರು ಹಿಂದಿಯಲ್ಲಿ ಜೋರಾಗಿ ಬೈದು, ಚೀನಿ ಸೈನಿಕರನ್ನು ಲಘುವಾಗಿ ಹಿಂದಕ್ಕೆ ತಳ್ಳುವುದು ಕಂಡುಬಂದಿದೆ.
19 ನಿಮಿಷಗಳ ವಿಡಿಯೋದಲ್ಲಿ ಉಭಯ ದೇಶಗಳ ಸೈನಿಕರು ಪರಸ್ಪರ ಮಾತಿನ ಚಕಮಕಿ ನಡೆಸುವ ಚಿತ್ರಣವಿದೆ.
ಈ ಘಟನೆ ನಡೆದ ಪ್ರದೇಶ ಹಿಮಾಚಲಪ್ರದೇಶವೋ, ಅಸ್ಸಾಂ ಅಥವಾ ಲಡಾಖ್ ಗಡಿಪ್ರದೇಶವೋ ಎಂಬುದು ಖಚಿತಪಟ್ಟಿಲ್ಲ.