ನವದೆಹಲಿ : ಭೂಗತ ಪಾತಕಿ ದಾವೂದ್ ಇಬ್ರಾಹಿಂ ಪಾಕಿಸ್ತಾನದಲ್ಲೇ ವಾಸವಾಗಿದ್ದಾನೆ ಎಂಬ ಭಾರತದ ವಾದಕ್ಕೆ ಮತ್ತಷ್ಟು ಪುಷ್ಟಿ ದೊರೆತಿದ್ದು, ಆತ ಕರಾಚಿಯ ಕ್ಲಿಫ್ಟನ್ ಉಪನಗರದ ಬೃಹತ್ ಬಂಗ್ಲೆಯೊಂದರಲ್ಲಿ ವಾಸಿಸುತ್ತಿರುವುದು ಮಾಧ್ಯಮವೊಂದರ ಕುಟುಕು ಕಾರ್ಯಾಚರಣೆಯಲ್ಲಿ ಬಯಲಾಗಿದೆ.
ಆಫ್ಘನ್ ನಿರಾಶ್ರಿತನೊಬ್ಬ ದಾವೂದ್ ಬಂಗ್ಲೆ ಇರುವ ಪ್ರದೇಶದ ಕುರಿತು ಸುಳಿವು ನೀಡಿದ್ದಾನೆ. ಆತ ನೀಡಿದ ಸುಳಿವಿನ ಮೇರೆಗೆ ತೆರಳಿದಾಗ ಬಂಗ್ಲೆ ಇರುವ ಜಾಗ ಪತ್ತೆಯಾಗಿದೆ ಎನ್ನಲಾಗಿದೆ.
ದಾವೂದ್ ಕರಾಚಿಯ ನಿವಾಸದಲ್ಲಿ ವಾಸವಿದ್ದಾನೆ ಎಂದು ಈ ಹಿಂದೆ ಹಲವು ಬಾರಿ ಭಾರತ ಹೇಳಿತ್ತು. ಇದಕ್ಕೆ ಪೂರಕ ದಾಖಲೆಗಳನ್ನೂ ನೀಡಿತ್ತು.ಆದಾಗ್ಯೂ ಪಾಕಿಸ್ತಾನ ಈ ವಿಚಾರವನ್ನು ನಿರಾಕರಿಸುತ್ತಲೇ ಬಂದಿತ್ತು. ಕಳೆದ 23 ವರ್ಷಗಳಿಂದಲೂ ದಾವೂದ್ ಕರಾಚಿಯಲ್ಲಿದ್ದಾನೆ ಎನ್ನಲಾಗಿದೆ.
ಕ್ಲಿಫ್ಟನ್ ನ ಬಂಗ್ಲೆಯಲ್ಲಿ ದಾವೂದ್ ವಾಸವಿರುವುದನ್ನು ಪಾಕಿಸ್ತಾನದ ಕೆಲ ಅಧಿಕಾರಿಗಳೂ ಒಪ್ಪಿಕೊಂಡಿದ್ದಾರೆ. ಸ್ಥಳೀಯ ನಿವಾಸಿಗಳೂ ಇದನ್ನು ದೃಢೀಕರಿಸಿದ್ದಾರೆ ಎಂದು ಸುದ್ದಿವಾಹಿನಿ ತಿಳಿಸಿದೆ. ದಾವೂದ್ ಬಂಗ್ಲೆ ಸುತ್ತಲಿನ ಪ್ರದೇಶಗಳಲ್ಲಿ ವಾಸವಾಗಿರುವ ಹಲವು ನಾಗರಿಕರನ್ನೂ ಸಂದರ್ಶಿಸಲಾಗಿತ್ತು. ಕುಟುಕು ಕಾರ್ಯಾಚರಣೆಯ ವಿಡಿಯೋವನ್ನೂ ಬಿಡುಗಡೆ ಮಾಡಲಾಗಿದೆ. ಏತನ್ಮಧ್ಯೆ, ಪಾಕ್ ಸೇನಾ ಮುಖ್ಯಸ್ಥ ರಹೀಲ್ ಶರೀಫ್ ಜತೆ ದಾವೂದ್ ನಿಕಟ ಸಂಪರ್ಕ ಹೊಂದಿದ್ದಾನೆ ಎಂದು ಮೂಲಗಳು ತಿಳಿಸಿವೆ.
ದಾವೂದ್ನ ಬಂಗ್ಲೆ ಹಾಗೂ ಅದರ ಕಂಪೌಂಡ್ ಅಲ್ಖೈದಾ ಮುಖ್ಯಸ್ಥ ಒಸಾಮಾ ಬಿನ್ ಲಾಡೆನ್ ಅಬೊಟ್ಟಾಬಾದ್ ನಲ್ಲಿ ವಾಸವಿದ್ದ ಬೃಹತ್ ಬಂಗ್ಲೆ ಮಾದರಿಯಲ್ಲೇ ಇದೆ. ಸುತ್ತಲೂ ಖಾಲಿ ಸೈಟ್ ಇದೆ. ಬಂಗ್ಲೆಯ ಆವರಣದಲ್ಲಿ ಮೂರು ಮೀಟರ್ಗಿಂತಲೂ ಎತ್ತರದ ಕಂಪೌಂಡ್ ಇದೆ. ಒಟ್ಟಾರೆಯಾಗಿ, ದಾವೂದ್ ಬಂಗ್ಲೆ ಅಭೇದ್ಯ ಕೋಟೆಯಂತಿದೆ ಎಂದು ವರದಿ ತಿಳಿಸಿದೆ.