April 22, 2015

ರೈಲ್ವೆ ಜನರಲ್‌ ಟಿಕೆಟ್‌ಗೆ ಕ್ಯೂ ನಿಲ್ಲಬೇಕಿಲ್ಲ

ನವದೆಹಲಿ : ರೈಲ್ವೆ ನಿಲ್ದಾಣದಲ್ಲಿ ಉದ್ದನೆಯ ಸರತಿ ಸಾಲಿನಲ್ಲೇ ನಿಂತು ಇನ್ನು ಮುಂದೆ ಟಿಕೆಟ್‌ ಖರೀದಿಸಬೇಕು ಎಂದೇನಿಲ್ಲ. ಅನ್‌ ರಿಸರ್ವ್ಡ್ (ಸಾಮಾನ್ಯ) ಟಿಕೆಟ್‌ ಗಳನ್ನು ಇನ್ನು ಮೊಬೈಲ್‌ ಆಪ್‌ ಮೂಲಕವೇ ಖರೀದಿಸಬಹುದು.

ತಿಂಗಳ ಪಾಸನ್ನೂ ಇದೇ ರೀತಿ ಖರೀದಿ ಮಾಡಬಹುದು. ಈ ವಿನೂತನ ಸೇವೆಗೆ ರೈಲ್ವೆ ಇಲಾಖೆ ಬುಧವಾರ ಚಾಲನೆ ನೀಡಲಿದೆ. ಇದಕ್ಕೆ ಸಂಬಂಧಿಸಿದ ಮೊಬೈಲ್‌ ಆಪನ್ನು ರೈಲ್ವೆ ಇಲಾಖೆ ಬಿಡುಗಡೆ ಮಾಡಲಿದೆ.

ಇದುವರೆಗೆ ಮುಂಗಡ ಕಾದಿರಿಸಿದ ಟಿಕೆಟ್‌ ಗಳನ್ನು ಮೊಬೈಲ್‌ ನಲ್ಲಿ ಲಭ್ಯವಿರುವ ಐಆರ್‌ ಸಿ ಟಿಸಿ ವೈಬ್‌ ಸೈಟ್‌ ಆಪ್‌ ಮೂಲಕ ಖರೀದಿಸಬಹುದಾಗಿತ್ತು. ಆದರೆ ಸಾಮಾನ್ಯ ಟಿಕೆಟ್‌ ಗಳ ಖರೀದಿ ಮೊಬೈಲ್‌ ನಲ್ಲಿ ಸಾಧ್ಯವಿರಲಿಲ್ಲ. ಈ ಸಮಸ್ಯೆಯನ್ನು ಹೊಸ ಅಪ್ಲಿಕೇಷನ್‌ ದೂರ ಮಾಡಲಿದೆ.

ಈ ಸೇವೆಯಿಂದ ಸರತಿ ಸಾಲಿನಲ್ಲಿ ನಿಲ್ಲುವುದು ತಪ್ಪಲಿದೆ. ಜತೆಗೆ ಟಿಕೆಟ್‌ ಮುದ್ರಣಕ್ಕೆ ಬೇಕಾದ ಕಾಗದವು ಉಳಿತಾಯವಾಗಲಿದ್ದು, ಪರಿಸರ ರಕ್ಷಣೆಗೆ ಅನುಕೂಲವಾಗಲಿದೆ. ರೈಲಿನಲ್ಲಿ ಟಿಕೆಟ್‌ ತಪಾಸಕರು ಆಗಮಿಸಿದಾಗ ಅವರಿಗೆ ಮೊಬೈಲ್‌ ಆಪ್‌ ನಲ್ಲಿರುವ ಟಿಕೆಟ್‌ ತೋರಿಸಿದರೆ ಸಾಕು. ಮುದ್ರಿತ ಪ್ರತಿಯನ್ನೇ ತೋರಿಸಬೇಕು ಎಂದೇನಿಲ್ಲ ಎಂದು ಅಧಿಕಾರಿಗಳು ಹೇಳಿದ್ದಾರೆ.

ಆಂಡ್ರಾಯ್ಡ ಆಧರಿತ ಫೋನ್‌ ಗಳಿಗೆ ಮಾತ್ರ ಈ ಸೇವೆ ಲಭ್ಯ. ಗೂಗಲ್‌ ಆಪ್‌ ಸ್ಟೋರ್‌ ಮೂಲಕ ಆಪ್‌ ಡೌನ್‌ ಲೋಡ್‌ ಮಾಡಿಕೊಳ್ಳಬಹುದು. ಬಳಿಕ ಬಳಕೆದಾರನಿಗೆ ನೋಂದಣಿ ಸಂಖ್ಯೆ ಸಿಗಲಿದೆ. ನೋಂದಣಿ ಸಂಖ್ಯೆ ಆಧರಿಸಿ ಟಿಕೆಟ್‌ ಬುಕ್‌ ಮಾಡಬಹುದು. ಟಿಕೆಟ್‌ ಖರೀದಿ ಹಣವನ್ನು ಮೊಬೈಲ್‌ ಪೇಮೆಂಟ್‌ ವ್ಯವಸ್ಥೆಯ ಇ-ವ್ಯಾಲೆಟ್‌ ಮೂಲಕ ಅಥವಾ ಐಆರ್‌ ಸಿಟಿಸಿ ವೆಬ್‌ ಸೈಟ್‌ ಮೂಲಕ ಅಥವಾ ಕ್ರೆಡಿಟ್‌/ಡೆಬಿಟ್‌ ಕಾರ್ಡ್‌ ಮೂಲಕ ಪಾವತಿಸಬಹುದು.

ಸ್ಮಾರ್ಟ್‌ ಫೋನ್‌ ಹೊಂದಿರುವವರು ರೈಲ್ವೆ ಆಪ್‌ ಡೌನ್‌ಲೋಡ್‌ ಮಾಡಿಕೊಳ್ಳಬೇಕು

ಆಪ್‌ ಡೌನ್‌ಲೋಡ್‌ ಬಳಿಕ ನೋಂದಣಿ ಸಂಖ್ಯೆ ಲಭ್ಯ

ನೋಂದಣಿ ಸಂಖ್ಯೆ ಬಳಸಿ ಟಿಕೆಟ್‌ ಖರೀದಿಸ‌ಬಹುದು

ಹಣ ಪಾವತಿಗೆ ಇ-ವ್ಯಾಲೆಟ್‌ ಬಳಸಬಹುದು ಅಥವಾ ಐಆರ್‌ಸಿಟಿಸಿ ವೆಬ್‌ಸೈಟ್‌ಗೆ ತೆರಳಿ ಡೆಬಿಡ್‌/ ಕ್ರೆಡಿಟ್‌ ಕಾರ್ಡ್‌ ಮೂಲಕವೂ ಪಾವತಿ ಅವಕಾಶ