ನವದೆಹಲಿ : ಯುದ್ಧ ವಿಮಾನಗಳಿಗೆ ಇಂಧನ ಪೂರೈಕೆ ಮಾಡುವ 6 ವಿಮಾನಗಳ ಖರೀದಿಗೆ ಕೇಂದ್ರ ರಕ್ಷಣಾ ಸಚಿವಾಲಯ ಚಿಂತನೆ ನಡೆಸಿದೆ ಎಂದು ತಿಳಿದುಬಂದಿದೆ.
ಫ್ಲೈಟ್ ರಿಫ್ಯೂಯೆಲಿಂಗ್ ಏರ್ಕ್ರಾಫ್ಟ್ (ಎಫ್ಆರ್ಎ) ಮೂಲಕ ಬಾಂಬರ್ ಮತ್ತು ಯುದ್ಧ ವಿಮಾನಗಳಿಗೆ ಯುದ್ಧದ ಸಂದರ್ಭಗಳಲ್ಲಿ ತ್ವರಿತವಾಗಿ ಇಂಧನ ಪೂರೈಕೆ ಮಾಡುವ ಸಲುವಾಗಿ 6 ವಿಮಾನ ಖರೀದಿಸಲು ಕಳೆದೊಂದು ದಶಕದಿಂದ ಎರಡು ಬಾರಿ ಬಿಡ್ ಕರೆದರೂ ಜಾಗತಿಕ ಟೆಂಡರ್ಗಳನ್ನು ಸೆಳೆಯಲು ವಿಫಲವಾದ ಹಿನ್ನೆಲೆಯಲ್ಲಿ ಕೆಂದ್ರ ಸರ್ಕಾರ ನೇರ ಖರೀದಿಗೆ ಮುಂದಾಗಲಿದೆ ಎನ್ನಲಾಗಿದೆ.
ಸಿಬಿಐನಲ್ಲಿ ಏರ್ಬಸ್ ಕಂಪನಿ ಹೆಸರಿರುವುದರಿಂದ ಹಾಗೂ ಬಹುವೆಚ್ಚದ ಡೀಲ್ನಲ್ಲಿ ಹಲವು ವರ್ಷದಿಂದ ಒಂದೇ ಸ್ಥಿತಿ ಇರುವುದರಿಂದಾಗಿ ರಕ್ಷಣಾ ಸಚಿವಾಲಯ ಏರ್ಬಸ್-330 ಎಮ್ಆರ್ಟಿಟಿ ವಿಮಾನ ಖರೀದಿಗೆ 9 ಸಾವಿರ ಕೋಟಿ ಒಪ್ಪಂದವನ್ನು ಕಡಿದುಕೊಂಡಿದೆ. ಭಾರತೀಯ ವಾಯುಪಡೆಗೆ ಈ ಒಪ್ಪಂದ ಕಡಿತಗೊಂಡ ನಂತರ ನೇರ ಖರೀದಿ ಅನಿವಾರ್ಯವಾಗಿದೆ ಎಂದು ರಕ್ಷಣಾ ಸಚಿವಾಲಯದ ಉನ್ನತ ಅಧಿಕಾರಿಗಳು ಹೇಳಿದ್ದಾರೆ.
ವಾಯುಸೇನೆಗೆ ಅವಶ್ಯವಿರುವ ಗಾಳಿಯಲ್ಲಿ ಇಂಧನ ಪೂರೈಕೆ ವಿಮಾನ ಖರೀದಿಗಾಗಿ 2003-04 ರಲ್ಲಿ ಬೇಡಿಕೆಯಿಟ್ಟಿತ್ತು. ಇದರೊಟ್ಟಿಗೆ 2006 ರಲ್ಲಿ ಇಲ್ಯೂಷಿನ್ ಹೆಸರಿನ ಆರು ಟ್ಯಾಂಕರ್ ಖರೀದಿಗೂ ಪ್ರಸ್ತಾವನೆ ಸಲ್ಲಿಸಿತ್ತು.