ಅಹಮದಾಬಾದ್ : ಪ್ರಧಾನಿ ನರೇಂದ್ರ ಮೋದಿ ಅವರ ಕನಸಿನ 100 ಸ್ಮಾರ್ಟ್ ಸಿಟಿ ಯೋಜನೆಯನ್ವಯ ದೇಶದ ಮೊದಲ ಸ್ಮಾರ್ಟ್ ಸಿಟಿಯೊಂದು ಮೋದಿ ತವರು ರಾಜ್ಯ ಗುಜರಾತ್ ನಲ್ಲಿ ತಲೆಯೆತ್ತುತ್ತಿದೆ.
ಸಾಬರಮತಿ ನದಿ ದಂಡೆಯ ಗಾಂಧಿನಗರದ ಹೊರವಲಯದಲ್ಲಿ ಇದು ತಲೆಯೆತ್ತುತ್ತಿದ್ದು, ಮುಂದಿನ ಸ್ಮಾರ್ಟ್ ಸಿಟಿಗಳಿಗೆ ಮಾದರಿಯೆನ್ನಿಸಿಕೊಳ್ಳುತ್ತದೆ ಎಂದು ಹೇಳಲಾಗುತ್ತಿದೆ. ನರೇಂದ್ರ ಮೋದಿ ಮುಖ್ಯಮಂತ್ರಿ ಆಗಿದ್ದಾಗಲೇ ಯೋಜನೆ ಆರಂಭವಾಗಿತ್ತು.
ಸರ್ಕಾರದ ವತಿಯಿಂದ 860 ಎಕರೆಯಲ್ಲಿ ನಿರ್ಮಾಣವಾಗುತ್ತಿರುವ ಈ ಸ್ಮಾರ್ಟ್ ಸಿಟಿಗೆ ಗುಜರಾತ್ ಇಂಟರ್ ನ್ಯಾಷನಲ್ ಫೈನಾನ್ಸ್ ಟೆಕ್ ಸಿಟಿ (ಗಿಫ್ಟ್) ಎಂದು ಹೆಸರಿಡಲಾಗಿದೆ.
ಈವರೆಗೆ ಇಲ್ಲಿ 2 ಗಗನಚುಂಬಿ ಕಟ್ಟಡಗಳು ತಲೆಯೆತ್ತಿದ್ದು, ಭೂಮಿಯ ಅಡಿಯಲ್ಲಿ ಮೌಲಸೌಕರ್ಯ ವ್ಯವಸ್ಥೆಗಳನ್ನು ಅಳವಡಿಸಲಾಗಿದೆ. ಸ್ವಯಂಚಾಲಿತ ಕಸ ಸಂಗ್ರಹಣೆ, ನಲ್ಲಿಯಲ್ಲಿ ಶುದ್ಧ ಕುಡಿವ ನೀರು, ಈ ನಗರಕ್ಕೆಂದೇ ವಿಶೇಷ ವಿದ್ಯುತ್ ಉತ್ಪಾದನೆ, ಅಗಲವಾದ ರಸ್ತೆಗಳು, ಗಗನಚುಂಬಿ ಕಟ್ಟಡಗಳು, ಐಷಾರಾಮಿ ಐಭೋಗಗಳು- ಈ ನಗರದ ಹೈಲೈಟ್ಸ್.
ಮೊದಲ ಹಂತದಲ್ಲಿ ಈ ನಗರ ನಿರ್ಮಾಣಕ್ಕೆ 900 ಕೋಟಿ ರೂ. ಬಳಸಲಾಗಿದೆ. ಕಾಮಗಾರಿ ಇನ್ನೂ ಮುಂದುವರಿಯುತ್ತಿದೆ.
ಗಿಫ್ಟ್ ಸ್ಮಾರ್ಟ್ ಸಿಟಿಯ ಒಂದು ಬದಿ ನದಿ ಇದೆ. ಇನ್ನೊಂದು ಬದಿ ರಾಜಧಾನಿ ಗಾಂಧಿನಗರ, ವಾಣಿಜ್ಯ ನಗರಿ ಅಹಮದಾಬಾದ್ ಇವೆ. ಅಹಮದಾಬಾದ್ ನಲ್ಲಿ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣವೂ ಇದೆ. ಇದು ಈ ಸ್ಮಾರ್ಟ್ ಸಿಟಿಗೆ ಅನುಕೂಲಕರ ವಾತಾವರಣ ನಿರ್ಮಿಸಿವೆ.