ಫ್ಲೋರಿಡಾ : ಉಗ್ರ ದಾಳಿಗೆ ಅಮೆರಿಕ ಮತ್ತೊಮ್ಮೆ ಬೆಚ್ಚಿದೆ. ಫ್ಲೋರಿಡಾದ ಒರ್ಲಾಂಡೋದಲ್ಲಿರುವ ಸಲಿಂಗಿಗಳ ನೈಟ್ ಕ್ಲಬ್ಗೆ ನುಗ್ಗಿದ ಶಂಕಿತ ಇಸ್ಲಾಮಿಕ್ ಉಗ್ರನೊಬ್ಬ ಮನಬಂದಂತೆ ಗುಂಡಿನ ದಾಳಿ ನಡೆಸಿದ್ದಾನೆ. ಪರಿಣಾಮ 50ಕ್ಕೂ ಹೆಚ್ಚು ಮಂದಿ ಸಾವನ್ನಪ್ಪಿದ್ದು, 53 ಜನರು ಗಾಯಗೊಂಡಿದ್ದಾರೆ.
ಸಾವಿನ ಸಂಖ್ಯೆ ಮತ್ತಷ್ಟು ಹೆಚ್ಚುವ ಭೀತಿ ಎದುರಾಗಿದೆ. ಈ ಶೂಟೌಟ್ ಬಳಿಕ ಒರ್ಲಾಂಡೋದಲ್ಲಿ ತುರ್ತುಸ್ಥಿತಿ ಘೋಷಿಸಲಾಗಿದೆ. ದಾಳಿಕೋರನನ್ನು ಅಫ್ಘಾನಿಸ್ಥಾನ ಮೂಲದ ಅಮೆರಿಕ ಪ್ರಜೆ 29 ವರ್ಷದ ಉಮರ್ ಮತೀನ್ ಎಂದು ಗುರುತಿಸಲಾಗಿದ್ದು, ಈತ ಕೂಡ ಪೊಲೀಸರ ಪ್ರತಿ ಗುಂಡಿಗೆ ಬಲಿಯಾಗಿದ್ದಾನೆ.
ಬೆಳಗಿನ ಜಾವ 2 ಗಂಟೆಗೆ ಕ್ಲಬ್ ಬಾಗಿಲು ಮುಚ್ಚುವ ಸಂದರ್ಭದಲ್ಲಿ ಆತ್ಮಾಹುತಿ ದಾಳಿಗೆ ಸಿದ್ಧನಾಗಿ ಬಂದಿದ್ದ ಉಗ್ರ ಏಕಾಏಕಿ ಡ್ಯಾನ್ಸ್ ಕೊಠಡಿಯತ್ತ ನುಗ್ಗಿ ಗುಂಡಿನ ದಾಳಿ ನಡೆಸಿದ್ದಾನೆ. ದಿಢೀರ್ ನಡೆದ ಈ ದಾಳಿಯಲ್ಲಿ 50 ಮಂದಿ ಸ್ಥಳದಲ್ಲಿ ಸಾವನ್ನಪ್ಪಿದರೆ 50ಕ್ಕೂ ಹೆಚ್ಚು ಜನರು ಗಾಯಗೊಂಡರು. ಈ ಸಂದರ್ಭದಲ್ಲಿ ಕೆಲವರನ್ನು ಹಂತಕ ಒತ್ತೆಯಾಳಾಗಿಟ್ಟುಕೊಂಡಿದ್ದ ಎನ್ನಲ್ಲಾಗಿದೆ. ಘಟನೆ ನಡೆದ ತಕ್ಷಣವೇ ಸ್ಥಳಕ್ಕೆ ತೆರಳಿದ ಪೊಲೀಸರು 4 ಗಂಟೆಗಳ ಕಾಲ ಗುಂಡಿನ ಕಾಳಗ ನಡೆಸಿ ಹಂತಕನನ್ನು ಹತ್ಯೆಗೈದಿದ್ದಾರೆ.ತತ್ಕ್ಷಣಕ್ಕೆ ಇದನ್ನು ಭಯೋತ್ಪಾದನ ಕೃತ್ಯ ಎಂದು ಘೋಷಿಸಲು ಸಾಧ್ಯವಿಲ್ಲವಾದರೂ ಈ ನಿಟ್ಟಿನಲ್ಲಿ ತನಿಖೆ ಮುಂದುವರಿದಿದೆ. ಪ್ರಕರಣದ ಕುರಿತು ಎಫ್ಬಿಐ ಕೂಡ ತನಿಖೆ ಆರಂಭಿಸಿದೆ.
ಉಗ್ರರ ಈ ದಾಳಿ ಕುರಿತು ಅಮೆರಿಕ ಅಧ್ಯಕ್ಷ ಬರಾಕ್ ಒಬಾಮ, ಹಿಲರಿ ಕ್ಲಿಂಟನ್ ಖಂಡನೆ ವ್ಯಕ್ತಪಡಿಸಿದ್ದಾರೆ