June 30, 2015

ಇಂಡೊನೇಶ್ಯಾದ ವಾಯು ಪಡೆಗೆ ಸೇರಿದ ವಿಮಾನ ಪತನ: 38 ಜನ ಬಲಿ

ಮೇದಾನ್‌ : ಇಂಡೋನೇಶ್ಯದ ವಾಯು ಪಡೆಗೆ ಸೇರಿದ ವಿಮಾನವೊಂದು ಆಗಸಕ್ಕೆ ಟೇಕಾಫ್ ಮಾಡಿದ ಕೆಲವೇ ಕ್ಷಣಗಳಲ್ಲಿ ಸ್ಫೋಟಗೊಂಡು ಮೇದಾನ್‌ ನಗರದ ಮೇಲೆ ಪತನಗೊಂಡ ಪರಿಣಾಮ 38 ಮಂದಿ ಮೃತಪಟ್ಟಿದ್ದಾರೆ.

ಹರ್ಕ್ಯುಲಿಸ್ ಸಿ-130 ಸಂಖ್ಯೆಯ ವಾಯುಪಡೆ ವಿಮಾನ ಸುಮಾತ್ರ ದ್ವೀಪದಲ್ಲಿನ ಮೇದಾನ್‌ ನಗರದ ಮೇಲೆ ಪತನಗೊಂಡಾಗ ಹಲವಾರು ಕಟ್ಟಡಗಳು ತೀವ್ರವಾಗಿ ಹಾನಿಗೊಂಡಿದ್ದು, ಹಲವಾರು ವಾಹನಗಳು ಬೆಂಕಿಗೆ ಆಹುತಿಯಾಗಿವೆ.

ವಿಮಾನ ಪತನಗೊಂಡ ತಕ್ಷಣವೇ ರಕ್ಷಣಾ ಕಾರ್ಯಾಚರಣೆಯನ್ನು ಆರಂಭಿಸಲಾಗಿದೆ. ಈವರೆಗೆ ಒಂದು ಮಗು ಸೇರಿದಂತೆ ಒಟ್ಟು 38 ಮೃತದೇಹಗಳನ್ನು ಹೊರತೆಗೆಯಲಾಗಿದೆ. ಗಾಯಾಳುಗಳನ್ನು ಮೇದಾನ್‌ ಆಸ್ಪತ್ರೆಗೆ ಸಾಗಿಸಲಾಗಿದೆ ಎಂದು ರಕ್ಷಣಾ ಕಾರ್ಯಾಚರಣೆಯಲ್ಲಿ ನೆರವಾಗುತ್ತಿರುವ ರೆಡ್‌ ಕ್ರಾಸ್‌ ಅಧಿಕಾರಿ ಎಕೋ ತ್ರಿಯಾಂಡಿ ತಿಳಿಸಿದ್ದಾರೆ.

ಇಂಡೋನೇಶ್ಯದ ಸೇನೆ ತಿಳಿಸಿರುವ ಪ್ರಕಾರ ವಾಯುಪಡೆ ವಿಮಾನದಲ್ಲಿ 12 ಚಾಲಕ ಸಿಬಂದಿಗಳಿದ್ದರು. ವಾಯುಪಡೆ ವಿಮಾನ ಇಂದು ಮಂಗಳವಾರ ಮಧ್ಯಾಹ್ನ 12.08 ಹೊತ್ತಿಗೆ ವಾಯುಪಡೆಯ ನೆಲೆಯಿಂದ ಗಗನಕ್ಕೆ ನೆಗೆದಿತ್ತು. ಅದಾಗಿ ಎರಡೇ ನಿಮಿಷಗಳಲ್ಲಿ ಅದು ವಾಯುಪಡೆ ನೆಲೆಯಿಂದ ಕೇವಲ ಐದು ಕಿ.ಮೀ. ದೂರದಲ್ಲಿ ಜನದಟ್ಟನೆಯ ನಗರದ ಮೇಲೆ, ಜನರು ವಾಸಿಸುವ ಕಟ್ಟಡಗಳ ಮೇಲೆ ಬೆಂಕಿಯ ಗೋಲವಾಗಿ ಸ್ಫೋಟಗೊಂಡು ಪತನಗೊಂಡಿತು ಎಂದು ಮಿಲಿಟರಿ ವಕ್ತಾರ ಫ‌ುವಾದ್‌ ಬಾಸ್ಯಾ ತಿಳಿಸಿದ್ದಾರೆ.