April 2, 2015

ರಷ್ಯಾದಲ್ಲಿ ದೋಣಿ ದುರಂತ: 70 ಕ್ಕೂ ಹೆಚ್ಚು ಮಂದಿ ಸಾವು

ಮಾಸ್ಕೋ : ರಷ್ಯಾದ ಪೂರ್ವ ಸಮುದ್ರದಲ್ಲಿ ಕಳೆದ ರಾತ್ರಿ ಸಂಭವಿಸಿದ ದೋಣಿ ದುರಂತದಲ್ಲಿ ಕನಿಷ್ಠ 70 ಮಂದಿ ಮೃತಪಟ್ಟಿದ್ದಾರೆ. ಈ ಬೋಟ್‌ನಲ್ಲಿ 132 ಜನರಿದ್ದರು. ಈಗಾಗಲೇ 59 ಮೃತದೇಹ ಪತ್ತೆಯಾಗಿದ್ದು, ಉಳಿದ ಮೃತದೇಹಗಳಿಗಾಗಿ ಶೋಧಕಾರ್ಯ ನಡೆದಿದೆ. ಉಳಿದ 62 ಪ್ರಯಾಣಿಕರು ಪಾರಾಗಿದ್ದಾರೆ ಎಂದು ರಷ್ಯಾ ಮಾಧ್ಯಮಗಳು ವರದಿ ಮಾಡಿವೆ.

ಬದುಕುಳಿದವರೆಲ್ಲ ಬೋಟ್‌ ನ ಸಿಬ್ಬಂದಿ. ರಷ್ಯಾದ ಪೂರ್ವದಲ್ಲಿರುವ ಕಾಮ್‌ ಚಟ್ಕ ತೀರ ಪ್ರದೇಶದಲ್ಲಿ ಈ ದುರಂತ ಸಂಭವಿಸಿದ್ದು, ಮುಳುಗಿರುವ ದೋಣಿಯನ್ನು ದಲ್ನೀಯ್ ವೋಸ್ಟಕ್ ಎಂದು ಹೇಳಲಾಗಿದೆ.

ಈ ದೋಣಿಯಲ್ಲಿ 40 ಮಂದಿ ಮ್ಯಾನ್ಮಾರಿಗಳು, 78 ಜನ ರಷ್ಯನ್ನರು ಹಾಗೂ ಉಕ್ರೇನ್ ಲಿಥುವೇನಿಯಾ ಮತ್ತು ವನೂವಾಟು ಪ್ರಾಂತ್ಯಗಳಿಗೆ ಸೇರಿದ ಪ್ರಜೆಗಳಿದ್ದರು ಎಂದು ಕರಾವಳಿ ಪಡೆಯ ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.