K R Puram : 'ಪಾಕಿಸ್ತಾನ'ದಲ್ಲಿ ಮುದ್ರಿಸಿದ್ದ ಖೋಟಾ ನೋಟುಗಳನ್ನು ಬಾಂಗ್ಲಾ ಮೂಲಕ ಭಾರತದಲ್ಲಿ ಚಲಾವಣೆ ಮಾಡುತ್ತಿದ್ದ ಜಾಲವನ್ನು ಬೆಂಗಳೂರು ಪೊಲೀಸರು ಪತ್ತೆ ಹಚ್ಚಿದ್ದು 6 ಮಂದಿಯನ್ನು ಬಂಧಿಸಿದ್ದಾರೆ.
ಬಂಧಿತ ಆರೋಪಿಗಳು ಪಾಕಿಸ್ತಾನದಲ್ಲಿ ಮುದ್ರಣವಾಗುತ್ತಿದ್ದ ಖೋಟಾ ನೋಟುಗಳನ್ನು ಬಾಂಗ್ಲಾ ಹಾಗೂ ಪಶ್ಚಿಮ ಬಂಗಾಳದ ಮೂಲಕ ಭಾರತದಲ್ಲಿ ಯಶಸ್ವಿಯಾಗಿ ಚಲಾವಣೆ ಮಾಡುತ್ತಿದ್ದರು. ಪಶ್ಚಿಮ ಬಂಗಾಳದ ಸಾಬೀರ್ ಅಲಿ (23), ಮಸೂದ್ (18), ಗೌರಿಬಿದನೂರಿನ ಅಫ್ರೋಜ್ (41), ಮೈಸೂರಿನ ಆಸಿಫ್ ವುಲ್ಲಾಖಾನ್, ಮಹೀಬ್ ವುಲ್ಲಾಖಾನ್ (31) ಮತ್ತು ಬೆಂಗಳೂರಿನ ಕೆ.ಜೆ ಹಳ್ಳಿಯ ಸಯ್ಯದ್ ಆಸಿಫ್ (21) ಬಂಧಿತ ಆರೋಪಿಗಳು.
ಖೋಟಾ ನೋಟು ಚಲಾವಣೆ ಮಾಡುತ್ತಿದ್ದ ಆರೋಪಿಗಳಿಂದ 9.13 ಲಕ್ಷ ರೂ. ಮೌಲ್ಯದ 1000ರೂ. ಮುಖಬೆಲೆಯ 399 ಖೋಟಾನೋಟುಗಳು ಹಾಗೂ 500ರೂ. ಮುಖಬೆಲೆಯ 1028 ಖೋಟಾನೋಟುಗಳನ್ನು ಮತ್ತು 1.72 ಲಕ್ಷ ರೂ. ನಗದು, ಟಾಟಾ ಇಂಡಿಗೋ ಕಾರು, 10 ಮೊಬೈಲ್ಗಳು ಹಾಗೂ ಇನ್ನಿತರ ವಸ್ತುಗಳನ್ನು ವಶಪಡಿಸಿಕೊಳ್ಳಲಾಗಿದೆ.
ಮಹದೇವಪುರ ಪೊಲೀಸ್ ಠಾಣೆ ವ್ಯಾಪ್ತಿಯ ಕೆ.ಆರ್.ಪುರಂ ರೈಲು ನಿಲ್ದಾಣದ ಮುಂಭಾಗದಲ್ಲಿರುವ ಫ್ಲೈ ಓವರ್ ಸಮೀಪದ ಎ.ನಾರಾಯಣಪುರ ಜಂಕ್ಷನ್ ಬಳಿ ಸಿಲ್ವರ್ ಬಣ್ಣದ ಟಾಟಾ ಇಂಡಿಗೋ ಕಾರ್ ನಲ್ಲಿ ಬಂದಿದ್ದ ಈ ಆರೂ ಮಂದಿ ಖೋಟಾನೋಟು ಚಲಾವಣೆ ಮಾಡಲು ಯತ್ನಿಸುತ್ತಿದ್ದರು.