ಅಕ್ಕಿ ಹಿಟ್ಟಿಗೆ ಉಪ್ಪು ಹಾಕಿ, ಬಿಸಿ ನೀರು ಸೇರಿಸಿ ಗಟ್ಟಿಗೆ ಕಲಸಬೇಕು. ಕೊನೆಗೆ ಒಂದು ಚಮಚ ಎಣ್ಣೆ ಹಾಕಿ ನಾದಬೇಕು. ನಿಂಬೆ ಹಣ್ಣಿನ ಗಾತ್ರದ ಉಂಡೆ ಮಾಡಿಕೊಂಡು, ಅಕ್ಕಿ ಹಿಟ್ಟಿಗೆ ಮುಟ್ಟಿಸಿಕೊಂಡು ಚಪಾತಿ ಮಣೆಯಲ್ಲಿಟ್ಟು ವೃತ್ತಾಕಾರವಾಗಿ ಲಟ್ಟಿಸಬೇಕು. ಅದನ್ನು ಬಿಸಿ ಕಾವಲಿ ಮೇಲೆ ಹಾಕಿ, ತುಸು ಬಾಡಿದ ಬಳಿಕ ಕವುಚಿ ಹಾಕಬೇಕು. ಮತ್ತೆ ಮಗುಚಿ ಹಾಕಿ ತೆಗೆದು, ಕೆಂಡದ ಮೇಲಿಟ್ಟು ಉಬ್ಬಿಸಬೇಕು. ಗ್ಯಾಸ್ ಒಲೆ ಮೇಲೆ ಅಥವಾ ಕಾವಲಿಯ ಮೇಲೆಯೂ ಉಬ್ಬಿಸಬಹುದು. ಕೊಬ್ಬರಿ ಚಟ್ನಿ ಮಾಡಿಟ್ಟುಕೊಂಡರೆ ನೆಚ್ಚಿಕೊಂಡು ತಿನ್ನಬಹುದು.