ನವದೆಹಲಿ : ಕಳೆದ ಮೂರುದಿನಗಳ ಹಿಂದಷ್ಟೇ ಜಮ್ಮು-ಕಾಶ್ಮೀರದ ಪ್ಯಾಂಪೋರ್ ನಲ್ಲಿ ದಾಳಿ ನಡೆಸಿ 8 ಯೋಧರ ಧಾರುಣ ಸಾವಿಗೆ ಕಾರಣವಾದ ಲಷ್ಕರ್ ಉಗ್ರ ಸಂಘಟನೆ ಮತ್ತೊಂದು ಅಂತದ್ದೇ ದಾಳಿ ನಡೆಸಲು ಸಿದ್ಧತೆ ನಡೆಸಿದೆ ಎಂದು ಕೇಂದ್ರ ಗುಪ್ತಚರ ಇಲಾಖೆ ಎಚ್ಚರಿಕೆ ನೀಡಿದೆ.
ಲಷ್ಕರ್ ಎ ತೊಯ್ಬಾ ಉಗ್ರ ಸಂಘಟನೆ ಹೊಸ ಕಾರ್ಯಾಚರಣೆಯ ಕಮಾಂಡರ್ ಮಜೀದ್ ಝರ್ಗಾರ್ ಎಂಬಾತ ಹೊಸ ಫಿದಾಯೀನ್ (ಆತ್ಮಾಹುತಿ) ದಾಳಿಗಳನ್ನು ನಡೆಸುವ ಸಾಧ್ಯತೆಯಿದೆ. ದಾಳಿಗೆ ಸೂಕ್ತವೆನಿಸುವ ಸಮಯಕ್ಕಾಗಿ ಕಾದು ಕುಳಿತಿರುವ ಉಗ್ರರು ಯಾವ ಕ್ಷಣದಲ್ಲಾದರೂ ದಾಳಿ ನಡೆಸುವ ಸಾಧ್ಯತೆಯಿದೆ ಎಂದು ಹೇಳಿದೆ.
ಲಷ್ಕರ್ನ ಫಿದಾಯೀನ್ ದಾಳಿಕೋರರು ಸಿಆರ್ಪಿಎಫ್ ಜವಾನರ ಮೇಲೆ ಪ್ಯಾಂಪೋರ್ ಮಾದರಿಯಲ್ಲಿ ದಾಳಿ ನಡೆಸುವ ಸಾಧ್ಯತೆ ಇರುವುದರಿಂದ ಈ ಬಗ್ಗೆ ಕಟ್ಟೆಚ್ಚರ ವಹಿಸುವಂತೆ ಮತ್ತು ಭದ್ರತಾ ಪಡೆಗಳು ಹಾಗೂ ಪೊಲೀಸ್ ಪಡೆಗಳು ಪರಸ್ಪರರೊಳಗೆ ಉತ್ತಮ ಹೊಂದಾಣಿಕೆ, ಸಂಪರ್ಕ, ಸಂವಹನವನ್ನು ಹೊಂದುವಂತೆ ಗೃಹ ಸಚಿವಾಲಯವು ಕಟ್ಟೆಚ್ಚರದ ಸಂದೇಶ ರವಾನಿಸಿದೆ.
ಅಲ್ಲದೆ ಸೂಕ್ಷ್ಮ ಪ್ರದೇಶಗಳಲ್ಲಿ ಮತ್ತು ಅನುಮಾನಾಸ್ಪದ ಪ್ರದೇಶಗಳಲ್ಲಿ ಶೋಧ ನಡೆಸುವಂತೆ ಸೂಚನೆ ನೀಡಿದೆ.