ಬೆಂಗಳೂರು : ಸ್ವದೇಶಿ ನಿರ್ಮಿತ ಹಿಂದೂಸ್ತಾನ್ ಟರ್ಬೋ ಟ್ರೈನರ್-40 (ಹೆಚ್ಟಿಟಿ-40) ತರಬೇತಿ ವಿಮಾನವನ್ನು ಕೇಂದ್ರ ರಕ್ಷಣಾ ಸಚಿವ ಮನೋಹರ್ ಪರಿಕ್ಕರ್ ಅವರು ಲೋಕಾರ್ಪಣೆ ಮಾಡಿದ್ದಾರೆ.
ಹಿಂದೂಸ್ತಾನ್ ಏರೋನಾಟಿಕ್ಸ್ ಲಿಮಿಟೆಡ್ ಸಂಸ್ಥೆ (ಹೆಚ್ ಎಎಲ್)ನಿರ್ಮಿಸಿರುವ ಈ ಲಘು ವಿಮಾನ ಇನ್ನು ಭಾರತೀಯ ವಾಯುಸೇನೆಯ ಯೋಧರ ತರಬೇತಿಗೆ ಲಭ್ಯವಾಗಲಿದೆ.
ಸುಮಾರು 2,800 ಕೆಜಿ ತೂಕದ ಈ ಲಘು ವಿಮಾನ, 950ಎಸ್ ಹೆಚ್ ಪಿ ಕ್ಲಾಸ್ ಟರ್ಬೋ ಪ್ರಾಪ್ ಎಂಜಿನ್ ಹೊಂದಿದೆ. ವಾಯುಸೇನೆಯ ಪೈಲಟ್ ಗಳ ತರಬೇತಿಗಾಗಿ ಸೂಕ್ತ ವಿಮಾನದ ಬೇಡಿಕೆ ಇಟ್ಟಿದ್ದ ವಾಯುಸೇನೆಗೆ ಆಗಸ್ಟ್ 2013ರಲ್ಲಿ ಹೆಚ್ ಎಎಲ್ ಸಂಸ್ಥೆ, ವಿಮಾನದ ಡಿಸೈನ್, ತಾಂತ್ರಿಕತೆ ಕುರಿತಂತೆ ಮಾಹಿತಿ ನೀಡಿತ್ತು. ಹೆಚ್ ಎಎಲ್ ನ ಈ ಮಾದರಿಗೆ ಕೇಂದ್ರ ಸರ್ಕಾರ ಅನುಮೋದನೆ ನೀಡುತ್ತಿದ್ದಂತೆಯೇ 2015ರ ಮೇ ತಿಂಗಳಲ್ಲಿ ವಿಮಾನದ ನಿರ್ಮಾಣ ಕಾರ್ಯ ಆರಂಭಿಸಲಾಗಿತ್ತು.
12 ತಿಂಗಳ ನಂತರ ಮೊದಲ ವಿಮಾನದ ಪರೀಕ್ಷಾರ್ಥ ಹಾರಾಟ ನಡೆಸಲಾಯಿತು. ಭಾರತೀಯ ವಾಯುಸೇನೆ ಈಗಾಗಲೇ 70 ಹೆಚ್ಟಿಟಿ-40 ವಿಮಾನಗಳಿಗೆ ಬೇಡಿಕೆ ಸಲ್ಲಿಸಿದೆ ಎಂದು ಹೆಚ್ಎಎಲ್ ಅಧಿಕಾರಿಗಳು ತಿಳಿಸಿದ್ದಾರೆ.
ಮೇ 31ರಂದು ಈ ಹಿಂದೂಸ್ತಾನ್ ಟರ್ಬೋ ಟ್ರೈನರ್ 40 ವಿಮಾನವನ್ನು ಪರೀಕ್ಷಾರ್ಥ ಹಾರಾಟ ನಡೆಸಲಾಗಿತ್ತು. ಅಂದು ವಿಮಾನ ಯಶಸ್ವಿ ಹಾರಾಟ ನಡೆಸಿದ್ದ ಹಿನ್ನಲೆಯಲ್ಲಿ ಈಗ ಕೇಂದ್ರ ಸಚಿವ ಮನೋಹರ್ ಪರಿಕ್ಕರ್ ಅವರು ಲೋಕಾರ್ಪಣೆ ಮಾಡಿದ್ದಾರೆ.
ಹಿಂದೂಸ್ತಾನ್ ಟರ್ಬೋ ಟ್ರೖನರ್-40,ತರಬೇತಿ ವಿಮಾನ,ಮನೋಹರ್ ಪರಿಕ್ಕರ್,ಲೋಕಾರ್ಪಣೆ,ಹೆಚ್ ಎಎಲ್