ಮುಂಬೈ : ಭಾರತೀಯ ರಿಸರ್ವ್ ಬ್ಯಾಂಕ್ ಹಾಲಿ ಹಣಕಾಸು ವರ್ಷದ ಮೊದಲ ದ್ವೆಮಾಸಿಕ ನೀತಿ ಪರಾಮರ್ಶೆಯನ್ನು ಅನಾವರಣಗೊಳಿಸಿದ್ದು ಬಡ್ಡಿ ದರವನ್ನು ಶೇ.0.25ರಷ್ಟು ಕಡಿತಗೊಳಿಸಿದೆ. ಪರಿಣಾಮ ಗೃಹ ಮತ್ತು ವಾಹನ ಸಾಲಗಳು ಇನ್ನಷ್ಟು ಅಗ್ಗವಾಗಲಿವೆ.
2013ರ ಸೆಪ್ಟಂಬರ್ನಲ್ಲಿ ಆರ್.ಬಿ.ಐ ಗವರ್ನರ್ ಆಗಿ ಅಧಿಕಾರ ಸ್ವೀಕರಿಸಿದಂದಿನಿಂದಲೂ ಹಣದುಬ್ಬರದ ಮೇಲೆ ಅಂಕುಶ ಹೇರುತ್ತಾ ಬಂದಿರುವ ರಘುರಾಮ ರಾಜನ್ ಅವರು ರೆಪೋ ದರವನ್ನು ಶೇ.6.50 ಪ್ರಮಾಣಕ್ಕೆ ನಿಗದಿಸಿದ್ದು ಇದು 2011ರ ಜನವರಿಯ ಬಳಿಕದ ಕನಿಷ್ಠ ಮಟ್ಟವಾಗಿದೆ.
ರಿವರ್ಸ್ ರೆಪೋ ದರವನ್ನು ಶೇ.0.25ರಷ್ಟು ಇಳಿಸಿರುವ ರಘುರಾಮ ರಾಜನ್, ಇದನ್ನೀಗ ಶೇ.5.50 ಪ್ರಮಾಣಕ್ಕೆ ನಿಗದಿಸಿದ್ದಾರೆ. ಆದರೆ ನಗದು ಮೀಸಲು ಅನುಪಾತವನ್ನು ಶೇ.4.0 ಪ್ರಮಾಣದಲ್ಲೇ ಉಳಿಸಿಕೊಂಡಿದ್ದಾರೆ.
ಕಳೆದ ಫೆ.2ರಂದು ರಘುರಾಮ ರಾಜನ್, ಆರ್.ಬಿ.ಐ ಬಡ್ಡಿದರಗಳಲ್ಲಿ ಯಾವುದೇ ಪರಿಷ್ಕರಣೆ ಮಾಡದೆ ಅವುಗಳನ್ನು ಯಥಾವತ್ತಾಗಿ ಉಳಿಸಿಕೊಂಡಿದ್ದರು. ಹಣದುಬ್ಬರ ಏರುವ ಮತ್ತು ಆರ್ಥಿಕಾಭಿವೃದ್ಧಿ ಗತಿಗೆ ಧಕ್ಕೆ ಉಂಟಾಗಬಹುದೆಂಬ ಶಂಕೆಯೇ ಇದಕೆ ಕಾರಣವಾಗಿತ್ತು.
2015ರಲ್ಲಿ ಆರ್.ಬಿ.ಐ ರೆಪೋ ದರವನ್ನು ಒಟ್ಟಾರೆಯಾಗಿ ಶೇ.1.25ರಷ್ಟು ಇಳಿಸಿದ್ದರೂ ವಾಣಿಜ್ಯ ಬ್ಯಾಂಕುಗಳು ಅದರ ಲಾಭವನ್ನು ತಮ್ಮ ಗ್ರಾಹಕರಿಗೆ ಬಿಟ್ಟುಕೊಡದೆ ಆರ್ಬಿ.ಐ ಗೆ ಮುಜುಗರ ಉಂಟುಮಾಡಿದ್ದವು.