ನವದೆಹಲಿ : ತೆರಿಗೆದಾರರಿಗೆ ಸಿಹಿ ಸುದ್ದಿ. ಇನ್ನು ಮುಂದೆ ಅದಾಯ ತೆರಿಗೆ ಇಲಾಖೆ ತೆರಿಗೆದಾರರ ತೆರಿಗೆ ಮರುಪಾವತಿ (ರಿಫಂಡ್) ಮೊತ್ತವನ್ನು 7-10 ದಿನಗಳ ಅಲ್ಪಾವಧಿಯಲ್ಲಿ ಹಿಂದಿರುಗಿಸುತ್ತದೆ. ಇತ್ತೀಚಿಗೆ ಇಲಾಖೆ ವಿದ್ಯುನ್ಮಾನ ಮತ್ತು ಆಧಾರ್ ಆಧಾರಿತ ಐಟಿಆರ್ ಪರಿಶೀಲನೆ ವ್ಯವಸ್ಥೆಯಲ್ಲಿ ಸುಧಾರಣೆ ತಂದ ಹಿನ್ನಲೆಯಲ್ಲಿ ಇನ್ನು ಮುಂದೆ ರೆರಿಗೆ ಮರುಪಾವತಿ 7-10 ದಿನಗಳಲ್ಲಿ ಆಗಲಿದೆ.
ಆದಾಯ ತೆರಿಗೆ ರಿಟರ್ನ್ ಅನ್ನು ಆಧಾರ್ ಅಥವಾ ಬ್ಯಾಂಕ್ ಡೇಟಾಬೇಸ್ ಮೂಲಕ ಪರಿಶೀಲನೆ ನಡೆಸುವ ಆದಾಯ ತೆರಿಗೆಯ ಇತ್ತೀಚಿನ ಕ್ರಮಕ್ಕೆ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದ್ದು, ಇದರಿಂದ 2015-16 ನೇ ಸಾಲಿನ ತೆರಿಗೆ ಮರುಪಾವತಿಯನ್ನು ಇಲಾಖೆ 15 ದಿನಗಳ ಒಳಗೆ ಅರ್ಹ ತೆರಿಗೆದಾರರ ಬ್ಯಾಂಕ್ ಖಾತೆಗೆ ವರ್ಗಾಹಿಸಲು ಸಾಧ್ಯವಾಗಿದೆ.
ಮೊದಲೆಲ್ಲ ತೆರಿಗೆ ಮರುಪಾವತಿ ಹಣಕ್ಕಾಗಿ ಕೆಲವು ದಿನಗಳು ಅಥವಾ ವರ್ಷಗಳೇ ಕಾಯಬೇಕಿತ್ತು. ಅದರೆ ಈಗಿನ ವಿದ್ಯುನ್ಮಾನ ಪರಿಶೀಲನೆಯ ಇ- ಫೈಲಿಂಗ್ ವ್ಯವಸ್ಥೆ ಗ್ರಾಹಕ ಸ್ನೇಹಿಯಾಗಿದ್ದು, ಇಲಾಖೆ ತೆರಿಗೆದಾರರಿಗೆ ಒಂದು ವಾರ ಅಥವಾ ಗರಿಷ್ಠ ಹತ್ತು ದಿನಗಳಲ್ಲಿ ತೆರಿಗೆ ಮರುಪಾವತಿಯಾಗುವ ನಿಟ್ಟಿನಲ್ಲಿ ಕೆಲಸ ಮಾಡುತ್ತಿದೆ.