May 21, 2015

ಜಿ-ಸ್ಯಾಟ್ 6 ಉಪಗ್ರಹ ಜುಲೈ ಅಥವಾ ಆಗಸ್ಟ್ ನಲ್ಲಿ ಉಡಾವಣೆ

ಬೆಂಗಳೂರು : ಮುಂದುವರಿದ ಸಂವಹನ ಉಪಗ್ರಹ ’ಜಿ-ಸ್ಯಾಟ್‌ 6' ಜುಲೈ ಅಥವಾ ಆಗಸ್ಟ್‌ ಮೊದಲ ವಾರದಲ್ಲಿ ಉಡಾವಣೆಯಾಗಲಿದೆ ಎಂದು ಇಸ್ರೋ ಅಧ್ಯಕ್ಷ ಡಾ|ಎ.ಎಸ್‌.ಕಿರಣ್‌ ಕುಮಾರ್‌ ತಿಳಿಸಿದ್ದಾರೆ.

ಬೆಂಗಳೂರಿನ ಕೇಂದ್ರೀಯ ಉತ್ಪಾದನಾ ತಾಂತ್ರಿಕ ಸಂಸ್ಥೆ (ಸಿಎಂಟಿಐ) ಆವರಣದಲ್ಲಿ ಭಾರತೀಯ ಮಾಪನಶಾಸ್ತ್ರ ಸೊಸೈಟಿ ಹಮ್ಮಿಕೊಂಡಿದ್ದ ’ವಿಶ್ವ ಮಾಪನಶಾಸ್ತ್ರ ದಿನಾಚರಣೆ' ಅಂಗವಾಗಿ ನಡೆದ ವಿಚಾರಸಂಕಿರಣ ಹಾಗೂ ವಸ್ತು ಪ್ರದರ್ಶನದಲ್ಲಿ ಪಾಲ್ಗೊಂಡ ಬಳಿಕ ಸುದ್ದಿಗಾರರೊಂದಿಗೆ ಅವರು ಮಾತನಾಡಿದರು.

ಐದು ಟ್ರಾನ್ಸ್‌ ಪಾಂಡರ್‌ಗಳನ್ನು ಒಳಗೊಂಡ ಬಹೂಪಯೋಗಿ ಸೇವೆಗಳನ್ನು ಒಳಗೊಂಡ ಬಹುನಿರೀಕ್ಷಿತ ಜಿ-ಸ್ಯಾಟ್‌ 6 ಉಪಗ್ರಹ ಉಡಾವಣೆಗೆ ಸಿದ್ಧತೆಗಳು ನಡೆದಿದ್ದು, ಜುಲೈ ಕೊನೆಯ ವಾರ ಅಥವಾ ಆಗಸ್ಟ್‌ ಮೊದಲ ವಾರದಲ್ಲಿ ನಭಕ್ಕೆ ಚಿಮ್ಮಲಿದೆ. ಉಪಗ್ರಹದಲ್ಲಿ ಸಣ್ಣ ಡಿವೈಸ್‌ ಗಳಿದ್ದು, ಆ್ಯಂಟೆನಾ ದೊಡ್ಡದಾಗಿರುತ್ತದೆ. ಇದರಿಂದ ಸಿಗ್ನಲ್‌ ಗ‌ಳನ್ನು ಸ್ವೀಕರಿಸಲು ಸಹಾಯವಾಗಲಿದೆ.

ಸಂವಹನ ಕ್ಷೇತ್ರದಲ್ಲಿ ದೇಶದ ಹಲವು ಬೇಡಿಕೆಗಳನ್ನು ಇದು ಪೂರೈಸಲಿದೆ ಎಂದು ವಿಶ್ವಾಸ ವ್ಯಕ್ತಪಡಿಸಿದರು. ಜಾಗತಿಕ ಜಿಪಿಎಸ್‌ ತಂತ್ರ ಜ್ನಾನಕ್ಕೆ ಸರಿಸಮವಾಗಿ ಎನ್‌.ಆರ್‌.ಎನ್‌.ಎಸ್‌.ಎಸ್‌ ಅನ್ನು ರೂಪಿಸಲು ಉದ್ದೇಶಿಸ ಲಾಗಿದೆ ಎಂದು ಹೇಳಿದರು.