ನವದೆಹಲಿ : 2024ರ ಒಲಂಪಿಕ್ಸ್ ಕ್ರೀಡಾಕೂಟದ ಆಥಿತ್ಯ ವಹಿಸಲು ಭಾರತ ಚಿಂತನೆ ನಡೆಸುತ್ತಿದೆ. 2024ರ ಒಲಂಪಿಕ್ಸ್ ಆಯೋಜನೆ ಮೇಲೆ ಕಣ್ಣಿಟ್ಟಿರುವ ಪ್ರಧಾನಿ ಮೋದಿ, ಅಹಮದಾಬಾದ್ ನಲ್ಲಿ ಒಲಂಪಿಕ್ಸ್ ಕ್ರಿಡಾಕೂಟ ನಡೆಸಲು ಉತ್ಸುಕರಾಗಿದ್ದಾರೆ.
ಪ್ರಧಾನಿ ನರೇಂದ್ರ ಮೋದಿ ಅವರನ್ನು ಭೇಟಿ ಮಾಡಲು ಅಂತರರಾಷ್ಟ್ರೀಯ ಒಲಂಪಿಕ್ ಸಮಿತಿ ಥಾಮ್ಸನ್ ಬಚ್ ಮುಂದಿನ ತಿಂಗಳು ನವದೆಹಲಿಗೆ ಆಗಮಿಸುತ್ತಿದ್ದಾರೆ. ಈ ಸಂದರ್ಭದಲ್ಲಿ 2024ರ ಒಲಂಪಿಕ್ಸ್ ಕ್ರೀಡಾ ಕೂಟವನ್ನು ಭಾರತದಲ್ಲಿ ಆಯೋಜಿಸುವ ಬಗ್ಗೆ ಮಾತುಕತೆ ನಡೆಯುವ ಸಾಧ್ಯತೆ ಇದೆ ಎಂದು ಡಿ.ಎನ್.ಎ ಪತ್ರಿಕೆ ವರದಿ ಮಾಡಿದೆ.
ಭಾರತದಲ್ಲಿ ಒಲಂಪಿಕ್ಸ್ ನಡೆಸುವ ಮೋದಿ ಚಿಂತನೆ, ಭಾರತವನ್ನು ಕ್ರೀಡಾ ಕ್ಷೇತ್ರದ ಶಕ್ತಿಕೇಂದ್ರವನ್ನಾಗಿಸಲು ಸಹಕಾರಿಯಾಗಲಿದೆ ಎಂದು ವಿಶ್ಲೇಷಿಸಲಾಗುತ್ತಿದೆ. ಒಂದು ವೇಳೆ ಭಾರತದಲ್ಲಿ ಒಲಂಪಿಕ್ಸ್ ನಡೆಯುವುದಾದಲ್ಲಿ ಅದು ಗುಜರಾತ್ ನಲ್ಲೇ ನಡೆಯಲಿದೆ ಎಂಬ ಮಾತು ಕೇಳಿಬರುತ್ತಿದೆ. ಈ ಬಗ್ಗೆ ಐ.ಒ.ಸಿಯೊಂದಿಗೆ ಈಗಾಗಲೇ ಕ್ರೀಡಾ ಸಚಿವಾಲಯದ ಕಾರ್ಯದರ್ಶಿ ಅಜಿತ್ ಮೋಹನ್ ಶರಣ್ ಮಾತುಕತೆ ನಡೆಸಿದ್ದಾರೆ ಎಂದು ಡಿ.ಎನ್.ಎ ವರದಿ ಮಾಡಿದೆ.
2016ರ ಒಲಂಪಿಕ್ಸ್ ಕ್ರೀಡಾ ಕೂಟದಲ್ಲಿ ಬ್ರೆಜಿಲ್ ಆಥಿತ್ಯ ವಹಿಸಲಿದೆ. ಇದಾದ ಬಳಿಕ 2020ರ ಒಲಂಪಿಕ್ಸ್ ಕ್ರೀಡಾಕೂಟವನ್ನು ಆಯೋಜಿಸುವ ಅವಕಾಶ ಜಪಾನ್ ದೇಶಕ್ಕೆ ಸಿಕ್ಕಿದೆ. ಇದರ ನಂತರ ನಡೆಯಲಿರುವ 2024ರ ಕ್ರೀಡಾಕೂತವನ್ನು ಆಯೋಜಿಸಲು ಭಾರತ ಉತ್ಸುಕವಾಗಿದೆ.