March 26, 2015

ಹೊಸ ಮಾವಿನ ತಳಿಗೆ ಮೋದಿ ಹೆಸರಿಟ್ಟ ಉತ್ತರ ಪ್ರದೇಶದ ಮಾವು ಬೆಳೆಗಾರ

ಲಖ್ನೌ : 'ಮಾವಿನ ಸಸಿ'ಗಳನ್ನು ಕಸಿ ಮಾಡುವ ಮೂಲಕ ಹೊಸ ತಳಿಗಳನ್ನು ರೂಪಿಸುವುದರಲ್ಲಿ ಖ್ಯಾತಿ ಪಡೆದಿರುವ ಉತ್ತರ ಪ್ರದೇಶದ ಮಾವು ಬೆಳೆಗಾರ ತಾವು ಅಭಿವೃದ್ಧಿ ಪಡಿಸಿರುವ ಹೊಸ ತಳಿಗೆ ಪ್ರಧಾನಿ ನರೇಂದ್ರ ಮೋದಿ ಅವರ ಹೆಸರಿಟ್ಟಿದ್ದಾರೆ.

ಹಾಜಿ ಕಲೀಮುಲ್ಲಾ ಎಂಬುವವರು, ಕೋಲ್ಕತ್ತಾ ಹಾಗೂ ಉತ್ತರ ಪ್ರದೇಶದ ಪ್ರಸಿದ್ಧ ಮಾವಿನ ತಳಿಗಳ ಕಸಿ ಮಾಡುವ ಮೂಲಕ 'ಮೋದಿ ಮ್ಯಾಂಗೋ' ಎಂಬ ಹೊಸ ತಳಿಯನ್ನು ತಯಾರಿಸಿದ್ದಾರೆ. ಅಷ್ಟೇ ಅಲ್ಲದೇ ಮೋದಿ ಹೆಸರಿನಲ್ಲಿ ತಯಾರಿಸಿರುವ ತಳಿಯ ಹಣ್ಣನ್ನು ಮೋದಿ ಅವರಿಗೆ ತಲುಪಿಸಬೇಕೆಂಬ ಮಹದಾಸೆ ಹೊಂದಿದ್ದಾರೆ.

ಹೊಸ ತಳಿಯ ಮಾವಿನ ಹಣ್ಣು ವಿಶೇಷವಾಗಿದ್ದು, ಇದನ್ನು ಮೋದಿ ಇಷ್ಟಪಡುತ್ತಾರೆ ಎಂದು ಹಾಜಿ ಕಲೀಮುಲ್ಲಾ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ. ವಿವಿಧ ರೀತಿಯ ಮಾವಿನ ತಳಿಗಳನ್ನು ಬೆಳೆಯುವುದರಿಂದಲೇ ಹಾಜಿ ಕಲೀಮುಲ್ಲಾ ಪ್ರಸಿದ್ಧಿ ಪಡೆದಿದ್ದು, ಈತನಿಗೆ ಪದ್ಮಶ್ರೀ ಪುರಸ್ಕಾರವೂ ದೊರೆತಿದೆ. ತಮ್ಮ ಹೊಸ ತಳಿಯ ಹಣ್ಣುಗಳಿಗೆ ಜನಸಾಮಾನ್ಯರಿಂದಲೂ ಮೆಚ್ಚುಗೆ ವ್ಯಕ್ತವಾಗಿದ್ದು, ಪ್ರಧಾನಿ ಮೋದಿಯೂ ಇದಕ್ಕೆ ಮೆಚ್ಚುಗೆ ವ್ಯಕ್ತಪಡಿಸಲಿದ್ದಾರೆ ಎಂಬುದು ಹಾಜಿ ಕಲೀಮುಲ್ಲಾ ಅವರ ವಿಶ್ವಾಸವಾಗಿದೆ.

ಈ ವ್ಯಕ್ತಿ ಈ ವರೆಗೂ ಸುಮಾರು 300 ವಿಧದ ಮಾವಿನ ತಳಿಗಳ ಹಣ್ಣುಗಳನ್ನು ಬೆಳೆಯುತ್ತಿದ್ದಾರೆ. ಮೋದಿ ಮ್ಯಾಂಗೋ ತಳಿಯ ಐದು ಸಸಿಗಳನ್ನು ಬೆಳೆಸಿದ್ದು ಅದನ್ನು ಮೋದಿ ತವರು ರಾಜ್ಯ ಗುಜರಾತ್ ಗೆ ಕಳಿಸುವುದಾಗಿ ಹೇಳಿದ್ದಾರೆ.

ತಮ್ಮ ಪ್ರಮಾಣವಚನ ಸ್ವೀಕಾರ ಸಮಾರಂಭಕ್ಕೆ ಸಾರ್ಕ್ ರಾಷ್ಟ್ರಗಳ ನಾಯಕರನ್ನು ಆಹ್ವಾನಿಸಿದ್ದ ಪ್ರಧಾನಿ ಅವರ ವ್ಯಕ್ತಿತ್ವವೇ ಹೊಸ ಮಾವಿನ ತಳಿಗೆ ಮೋದಿ ಹೆಸರನ್ನಿಡಲು ಪ್ರೇರಣೆ ಎಂದು ಹಾಜಿ ಕಲೀಮುಲ್ಲಾ ಹೇಳಿದ್ದಾರೆ.