ನವದೆಹಲಿ : ಬರೋಬ್ಬರಿ 20 ವರ್ಷಗಳ ಬಳಿಕ 1 ರೂ. ನೋಟುಗಳನ್ನು ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್.ಬಿ.ಐ) ಮತ್ತೆ ಮಾರುಕಟ್ಟೆಗೆ ಬಿಡುಗಡೆ ಮಾಡಿದೆ.
ರಾಜಸ್ಥಾನದ ನಾಥ್ ವಾಡಾದ ಶ್ರೀನಾಥ್ ಜಿ ದೇಗುಲದಲ್ಲಿ ಮಾ.6ರಂದು ನಡೆದ ಕಾರ್ಯಕ್ರಮದಲ್ಲಿ ಕೇಂದ್ರ ಹಣಕಾಸು ಖಾತೆ ಕಾರ್ಯದರ್ಶಿ ರಾಜೀವ್ ಮಹರ್ಷಿ ಅವರು 1 ರೂ. ನೋಟನ್ನು ಬಿಡುಗಡೆಗೊಳಿಸಿದ್ದಾರೆ. 2011ರ ಕಾಯಿನೇಜ್ ಕಾನೂನು ಪ್ರಕಾರ ಮತ್ತೆ ನೋಟು ಮುದ್ರಣಕ್ಕೆ ಆರ್.ಬಿ.ಐ ಶುರುಮಾಡಿದೆ. ಇದರೊಂದಿಗೆ ಸದ್ಯ ಚಾಲ್ತಿಯಲ್ಲಿರುವ 1 ರೂ. ನೋಟಗಳನ್ನೂ ವ್ಯವಹಾರದಲ್ಲಿ ಬಳಸಬಹುದಾಗಿದೆ. 1994ರ ನವೆಂಬರ್ ನಲ್ಲಿ ದೊಡ್ಡ ಮುಖ ಬೆಲೆಯ ನೋಟುಗಳ ಮುದ್ರಣಕ್ಕೆ ಅನುವು ಮಾಡಿಕೊಡುವ ಸಲುವಾಗಿ 1 ರೂ. ನೋಟು ಮುದ್ರಣವನ್ನು ಸ್ಥಗಿತಗೊಳಿಸಲಾಗಿತ್ತು.
1.ರೂ. ನೋಟನ್ನು ಶೇ.100ರಷ್ಟು ಶುದ್ಧ ಹತ್ತಿ ಕಾಗದದಿಂದ ತಯಾರಿಸಲಾಗಿದ್ದು, ಪ್ರತಿ ಚದರ ಮೀ.ಗೆ 90 ಗ್ರಾಂ ಭಾರವಿದೆ. ಅಲ್ಲದೇ 110 ಮೈಕ್ರಾನ್ ನಷ್ಟು ದಪ್ಪವಿದೆ. ಗುಲಾಬಿ ಹಸಿರು ಬಣ್ಣದ ಚೌಕಾಕಾರದ ಈ ನೋಟಿನಲ್ಲಿ ’ಸತ್ಯಮೇವ ಜಯತೆ' ಎಂದು ಬರೆಯದೇ ಕೇವಲ ಅಶೋಕ ಸ್ತಂಭದ ಚಿಹ್ನೆ, 1 ರೂ. ಎಂದು (ವಾಟರ್ ಮಾರ್ಕ್) ಬರೆಯಲಾಗಿದೆ.