February 24, 2015

ಲ್ಯಾಂಡ್ ಲೈನ್, ಮೊಬೈಲ್ ಕರೆ ದರದಲ್ಲಿ ಭಾರಿ ಇಳಿಕೆ!

ನವದೆಹಲಿ : ಲ್ಯಾಂಡ್ ಲೈನ್ ಸಂಪರ್ಕವನ್ನು ಉತ್ತೇಜಿಸುವ ನಿಟ್ಟಿನಲ್ಲಿ ಟೆಲಿಕಾಮ್ ರೆಗ್ಯುಲೇಟರ್(ಟ್ರಾಯ್) ಮಹತ್ವದ ನಿರ್ಧಾರ ಕೈಗೊಂಡಿದ್ದು, ಲ್ಯಾಂಡ್ ಲೈನ್ ಹಾಗೂ ಮೊಬೈಲ್ ಕರೆಗಳ ದರದಲ್ಲಿ ಭಾರೀ ಇಳಿಕೆ ಮಾಡಲು ಶಿಫಾರಸು ಮಾಡಿದೆ.

ಈ ಹಿಂದೆ ಲ್ಯಾಂಡ್ ಲೈನ್ ನಿಂದ ಲ್ಯಾಂಡ್ ಲೈನ್ ಹಾಗೂ ಲ್ಯಾಂಡ್ ಲೈನ್ ನಿಂದ ಮೊಬೈಲ್ ಕರೆ ದರ ಪ್ರತಿ ನಿಮಿಷಕ್ಕೆ 20 ಪೈಸೆಯಷ್ಟಿತ್ತು. ಇನ್ಮುಂದೆ ಈ ದರದಲ್ಲಿ ಬದಲಾವಣೆಯಾಗಲಿದ್ದು, ಕರೆ ದರ ಸಂಪೂರ್ಣ ಉಚಿತವಾಗಲಿದೆ. ಪ್ರಸ್ತುತ ಟ್ರಾಯ್ ಟಾರಿಫ್ ಪ್ರಕಾರ, ಸ್ಥಳೀಯ ಮತ್ತು ನ್ಯಾಷನಲ್ ಕರೆಗಳಿಗೆ ಮೊಬೈಲ್ ಟು ಮೊಬೈಲ್ ಗೆ ಈ ಮೊದಲು ನಿಮಿಷಕ್ಕೆ 20 ಪೈಸೆ ಇದ್ದ ದರ, ಇನ್ಮುಂದೆ 14 ಪೈಸೆಯಷ್ಟಾಗಲಿದೆ. ಇಂಟರ್ ಕನೆಕ್ಷನ್ ದರವನ್ನು ಕಡಿತ ಮಾಡುವ ಟ್ರಾಯ್ ನಿರ್ಧಾರದಿಂದ ಗ್ರಾಹಕರಿಗೆ ಲಾಭವಾಗಲಿದೆ.

ಬಿ.ಎಸ್.ಎನ್.ಎಲ್ ದೇಶದಲ್ಲಿಯೇ ಅತಿ ಹೆಚ್ಚು ಲ್ಯಾಂಡ್ ಲೈನ್ ಗ್ರಾಹಕರನ್ನು ಹೊಂದಿದೆ. ನಾವು ಈ ಅನುಕೂಲವನ್ನು ಗ್ರಾಹಕರಿಗೆ ಏಪ್ರಿಲ್ ತಿಂಗಳಿನಿಂದಲೇ ಮಾಡಿಕೊಡಲಿದ್ದೇವೆ ಎಂದು ಬಿ.ಎಸ್.ಎನ್.ಎಲ್ ಎಂ.ಡಿ ಅನುಪಮ್ ಶ್ರೀವಾಸ್ತವ್ ಟೈಮ್ಸ್ ಆಫ್ ಇಂಡಿಯಾಕ್ಕೆ ತಿಳಿಸಿದ್ದಾರೆ. ಟ್ರಾಯ್ ನ ಶಿಫಾರಸು ಗ್ರಾಹಕರಿಗೆ ಖುಷಿ ಕೊಡುವುದರಲ್ಲಿ ಅನುಮಾನವಿಲ್ಲ.

ಮೊಬೈಲ್ ನ ಒಳಬರುವ ಕರೆಗಳನ್ನು ದರ ರಹಿತ ಮಾಡಿದಾಗಿನಿಂದ ಲ್ಯಾಂಡ್ ಲೈನ್ ಕನೆಕ್ಷನ್ ಗಳನ್ನು ಕೇಳುವವರಿರಲಿಲ್ಲ. 2014ರ ವೇಳೆಗೆ ಮೊಬೈಲ್ ಸಂಪರ್ಕಗಳ ಸಂಖ್ಯೆ 94.39 ಕೋಟಿಯಷ್ಟಾಗಿದ್ದರೆ ಲ್ಯಾಂಡ್ ಲೈನ್ ಸಂಪರ್ಕಗಳ ಸಂಖ್ಯೆ ಕೇವಲ 2.7 ಕೋಟಿಯಷ್ಟಿತ್ತು.