ಬೈರೂತ್ : 'ಜೋರ್ಡಾನ್' ಪೈಲೆಟ್ ನ ಜೀವಂತವಾಗಿ ದಹಿಸಿದ ಘಟನೆ ನಡೆದ 24 ಗಂಟೆಗಳಲ್ಲಿ ಜೋರ್ಡಾನ್ ಆಡಳಿತ ಇಸ್ಲಾಮಿಕ್ ಉಗ್ರರ ವಿರುದ್ಧ ಸೇಡು ತೀರಿಸಿಕೊಂಡಿದೆ.
ಇಬ್ಬರು ಉಗ್ರರಿಗೆ ಮರಣ ದಂಡನೆ ವಿಧಿಸುವ ಮೂಲಕ ಜೋರ್ಡಾನ್ ತನ್ನ ಪೈಲೆಟ್ ನ ಸಾವಿಗೆ ಪ್ರತೀಕಾರ ತೀರಿಸಿಕೊಂಡಿದೆ. ಈ ಪೈಕಿ ಓರ್ವ ಮಹಿಳಾ ಉಗ್ರಳೂ ಸೇರಿದ್ದು ಆಕೆ ಆತ್ಮಾಹುತಿ ಬಾಂಬರ್ ಆಗಿದ್ದಳು ಎಂದು ತಿಳಿದುಬಂದಿದೆ.
ನೇಣಿಗೇರಿದ ಮಹಿಳೆ 2005 ರಲ್ಲಿ ಅಮ್ಮಾನ್ ಹೊಟೇಲ್ನಲ್ಲಿ ನಡೆದ ತ್ರಿವಳಿ ಬಾಂಬ್ ದಾಳಿ ಕೃತ್ಯದಲ್ಲಿ ಭಾಗಿಯಾದ ಸಾಜಿದಾ ಅಲ್ ರಿಶ್ ವಿ ಎಂಬ ಬಾಂಬರ್ ಆಗಿದ್ದು, ಆಕೆಯನ್ನು ಜೋರ್ಡಾನ್ ಸರ್ಕಾರ ಬಂಧಿಸಿ ಜೈಲಿನಲ್ಲಿರಿಸಿತ್ತು.
ಇಸ್ಲಾಮಿಕ್ ಉಗ್ರರ ಅಟ್ಟಹಾಸಕ್ಕೆ ಪ್ರತಿಕ್ರಿಯಿಸಿದ್ದ ಜೋರ್ಡಾನ್, ಭಯೋತ್ಪಾದಕರ ವಿರುದ್ಧ ಪ್ರತೀಕಾರ ತೀರಿಸಿಕೊಳ್ಳುವುದಾಗಿ ಪ್ರತಿಜ್ನೆ ಮಾಡಿತ್ತು. ಅದರಂತೆಯೇ ಈಗ ಇಬ್ಬರು ಉಗ್ರರನ್ನು ಗಲ್ಲಿಗೇರಿಸುವ ಮೂಲಕ ಸೇಡು ತೀರಿಸಿಕೊಂಡಿದೆ.
ಉಗ್ರರ ಮರಣದಂಡನೆಗೆ ಪ್ರತಿಕ್ರಿಯೆ ನೀಡಿರುವ ಇಸ್ಲಾಮಿಕ್ ಸ್ಟೇಟ್, ಜೋರ್ಡಾನ್ ಮೇಲೆ ಆಕ್ರಮಣ ನಡೆಸುವುದಾಗಿ ಎಚ್ಚರಿಸಿದೆ. ಇಬ್ಬರು ಉಗ್ರರನ್ನು ನೇಣುಹಾಕಿದ ಮಾತ್ರಕ್ಕೆ ಅದನ್ನು ಜೋರ್ಡಾನ್ ನ ಗೆಲುವು ಎಂದು ಹೇಳಲು ಸಾಧ್ಯವಿಲ್ಲ ಎಂದು ಇಸ್ಲಾಮಿಕ್ ಸ್ಟೇಟ್ ಎಚ್ಚರಿಸಿದೆ.
ಕಳೆದ ಡಿಸೆಂಬರ್ ನಲ್ಲಿ ತಾನು ಬಂಧಿಸಿ ಇಟ್ಟು ಕೊಂಡಿದ್ದ ಜೋರ್ಡಾನ್ ಮೂಲದ ಪೈಲಟ್ ಮಾಜ್ ಅಲ್ ಕಸಾಬೆಯನ್ನು ಇಸ್ಲಾಮಿಕ್ ಸ್ಟೇಟ್ ಉಗ್ರರು ಪಂಜರವೊಂದರಲ್ಲಿ ಇಟ್ಟು ಸಜೀವ ದಹನ ಮಾಡಿ ಅದರ ವಿಡಿಯೋ ಬಿಡುಗಡೆ ಮಾಡಿದ್ದರು.