ನವದೆಹಲಿ : ಪ್ರಧಾನಿ ನರೇಂದ್ರ ಮೋದಿ ಅವರು ಗೃಹ ಸಾಮರ್ಥ್ಯ ವಿದ್ಯುದ್ದೀಕರಣ ಕಾರ್ಯಕ್ರಮದಡಿಯಲ್ಲಿ ಎಲ್ಇಡಿ ಬಲ್ಬ್ ವಿತರಣಾ ಕಾರ್ಯಕ್ರಮಕ್ಕೆ ಚಾಲನೆ ನೀಡಿದರು.
ಈ ಸಂದರ್ಭದಲ್ಲಿ ಮಾತನಾಡಿದ ಅವರು ಎಲ್ಇಡಿಯನ್ನು ಪ್ರಕಾಶ ಪಥ -ಬೆಳಕಿನೆಡೆಗೆ ದಾರಿ ಎಂದು ಬಣ್ಣಿಸಿದರಲ್ಲದೆ ವಿದ್ಯುತ್ಛಕ್ತಿಯನ್ನು ಉತ್ಪಾದಿಸುವುದಕ್ಕಿಂತ ವಿದ್ಯುತ್ಛಕ್ತಿಯನ್ನು ಉಳಿಸುವುದು ಆರ್ಥಿಕ ದೃಷ್ಟಿಯಿಂದ ಹೆಚ್ಚು ಪ್ರಯೋಜನಕಾರಿ ಎಂದು ಅಭಿಪ್ರಾಯಪಟ್ಟರು.
ವಿದ್ಯುತ್ ದರಗಳನ್ನು ಕಡಿತಗೊಳಿಸಲು ಹಾಗೂ ಪರಿಸರವನ್ನು ಉಳಿಸಲು ಎಲ್ಇಡಿ ಬಲ್ಬ್ ಗಳ ಬಳಕೆ ಎಲ್ಲರಿಗೂ ಉಪಯುಕ್ತವಾಗಲಿದೆ ಎಂದು ಅವರು ನುಡಿದರು. ಈ ಬಲ್ಬ್ ಗಳು ಸಾಧಾರಣ ಬಲ್ಬ ಗಳಿಗಿಂತ 50 ಪಟ್ಟು ಹೆಚ್ಚಿನ ಬಾಳಿಕೆಯನ್ನು ಹೊಂದಿರುತ್ತವೆ ಹಾಗಾಗಿ ಮಧ್ಯಾವಧಿಯಲ್ಲಿ ಇವುಗಳು ಉತ್ತಮ ಶಕ್ತಿ ಸಂರಕ್ಷಕ ಹಾಗೂ ವೆಚ್ಚ ಸಂರಕ್ಷಕಗಳಾಗಿವೆ ಎಂದರು.
ಈ ಯೋಜನೆಯಡಿಯಲ್ಲಿ ದೆಹಲಿ ವಾಸಿಗಳು ಆನ್ಲೈನ್ ಮೂಲಕ ತಮ್ಮ ಆರ್ಡರ್ಗಳನ್ನು ನೀಡುವ ಉದ್ದೇಶದಿಂದ ವೆಬ್-ಆಧಾರಿತ ವ್ಯವಸ್ಥೆಗೂ ಸಹ ಪ್ರಧಾನಿಯವರು ಇದೇ ಸಂದರ್ಭದಲ್ಲಿ ಚಾಲನೆ ನೀಡಿದರು.
ಗೃಹ ಬಳಕೆಯಲ್ಲಿ ಮತ್ತು ದಾರಿದೀಪ ವ್ಯವಸ್ಥೆಯಲ್ಲಿ ಎಲ್ಇಡಿ ಬಲ್ಬ್ಗಳನ್ನು ಅಳವಡಿಸುವ ಈ ಮಹತ್ತರ ಯೋಜನೆಯು 2016ರ ಮಾರ್ಚ್ತಿಂಗಳಿನಲ್ಲಿ ಪೂರ್ಣಗೊಳ್ಳುವ ಗುರಿಯನ್ನು ಹಾಕಿಕೊಳ್ಳಲಾಗಿದೆ.