ನವದೆಹಲಿ : ಅರಬ್ಬೀಸಮುದ್ರದಲ್ಲಿ ಪಾಕ್ ಬೋಟ್ ಗಳು ಪತ್ತೆ ಪ್ರಕರಣ ಹಿನ್ನಲೆಯಲ್ಲಿ ಸಮುದ್ರದಲ್ಲಿ ತೀವ್ರ ಕಟ್ಟೆಚ್ಚರ ವಹಿಸಲು ಕರಾವಳಿ ಕಾವಲು ಪಡೆಗೆ ಕೇಂದ್ರ ಆದೇಶ ನೀಡಿದೆ.
ಈ ನಿಟ್ಟಿನಲ್ಲಿ ಗುಜರಾತ್ ಸಮುದ್ರ ತೀರದಲ್ಲಿ 173 ಮೆರಿನ್ ಕಮಾಂಡೋಗಳನ್ನು ನೌಕಾಪಡೆ ನಿಯೋಜಿಸಿದೆ . ಸಮುದ್ರದಲ್ಲಿ ಸಂಚರಿಸುವ ಬೋಟ್ ಗಳ ಬಗ್ಗೆ ಕಟ್ಟೆಚ್ಚರ ವಹಿಸಲಾಗಿದೆ.
ಗುಜರಾತ್ ನ ಎಲ್ಲಾ ಸಮುದ್ರ ತೀರದಲ್ಲಿ ಭಾರೀ ಭದ್ರತೆಕೈಗೊಳ್ಳಲಾಗಿದ್ದು, ಸಮುದ್ರ ತೀರದಲ್ಲಿ ಭದ್ರತಾ ದೃಷ್ಠಿಯಿಂದ ಠಾಣೆ ಸ್ಥಾಪನೆ ಮಾಡಲಾಗಿದೆ.
ಗುಜರಾತ್ ನ ಪೋರಬಂದರ್ ಕರಾವಳಿ ಸಮೀಪ ಜ.1ರಂದು ಮೂರು ಬೋಟ್ ಗಳು ಪತ್ತೆಯಾಗಿದ್ದವು. ಒಂದು ಬೋಟ್ ನಲ್ಲಿ ಭಾರೀ ಪ್ರಮಾಣದ ಸ್ಫೋಟಕಗಳನ್ನು ತುಂಬಲಾಗಿತ್ತು. ನೌಕಾಪಡೆ ಈ ಬೋಟ್ ಹಿಂಬಾಲಿಸಿದಾಗ ಬೋಟ್ ಸ್ಫೋಟಗೊಂಡಿತ್ತು. ಸಿಕ್ಕಿಹಾಕಿಕೊಳ್ಳುವ ಭೀತಿಯಿಂದ ದೋಣಿಯಲ್ಲಿದ್ದವರು ತಮ್ಮನ್ನು ತಾವೇ ಸ್ಫೋಟಿಸಿಕೊಂಡಿರುವ ಶಂಕೆ ವ್ಯಕ್ತವಾಗಿತ್ತಲ್ಲದೇ ಈ ಬೋಟ್ ಪಾಕಿಸ್ತಾನದ ಕರಾಚಿಯಿಂದ ಉಗ್ರರನ್ನು ಹೊತ್ತುತರುತ್ತಿತ್ತು ಎಂಬ ಶಂಕೆ ವ್ಯಕ್ತವಾಗಿತ್ತು.