ಶ್ರೀಹರಿಕೋಟಾ : 'ಇಸ್ರೋ' ತನ್ನ ಮಹತ್ವಾಕಾಂಕ್ಷೆಯ ಜಿ.ಎಸ್.ಎಲ್.ವಿ ಮಾರ್ಕ್ 3 ರಾಕೆಟ್ ನ್ನು ಯಶಸ್ವಿಯಾಗಿ ಉಡಾವಣೆ ಮಾಡಿದೆ.
ಡಿ.18ರಂದು ಆಂಧ್ರ ಪ್ರದೇಶದ ಶ್ರೀ ಹರಿಕೊಟಾದಲ್ಲಿರುವ ಸತೀಶ್ ಧವನ್ ಬಾಹ್ಯಾಕಾಶ ಉಡ್ಡಯನ ಕೇಂದ್ರದಲ್ಲಿ ನೌಕೆಯನ್ನು ಉಡಾವಣೆ ಮಾಡಲಾಗಿದೆ. ಮಾನವ ಸಹಿತ ಬಾಹ್ಯಾಕಾಶಯಾನ ಕೈಗೊಳ್ಳುವ ಸಾಮರ್ಥ್ಯ ಹೊಂದಿರುವ ಜಿ.ಎಸ್.ಎಲ್.ವಿ ಮಾರ್ಕ್ 3 ನೌಕೆ, ಇಸ್ರೋದ ಭವಿಷ್ಯದ ಮಾನವ ಸಹಿತ ಚಂದ್ರ ಮತ್ತು ಮಂಗಳಯಾನಕ್ಕೆ ಸಹಕಾರಿಯಾಗಲಿದೆ.
3650 ಕೆಜಿ ತೂಕದ ಜಿಎಲ್ವಿ ಮಾರ್ಕ್ 3 ಅತ್ಯಾಧುನಿಕ ರಾಕೆಟ್ ಆಗಿದ್ದು, 4 ಸಾವಿರ ಕೆಜಿ ತೂಕದ ಸ್ಪೇಸ್ ಕ್ಯಾಪ್ಸೂಲನ್ನು ಹೊರಬಲ್ಲ ಸಾಮರ್ಥ್ಯ ಹೊಂದಿದೆ.
ಪ್ರಸ್ತುತ ಪ್ರಾಯೋಗಿಕ ಉಡಾವಣೆ ನಡೆದಿದ್ದು ಸುಮಾರು 126 ಕಿ.ಮೀ ಮಾತ್ರ ಸಂಚರಿಸಲಿದೆ. ರಾಕೆಟ್ ನಿಂದ ಕೇರ್ ಉಪಕರಣ ಬೇರ್ಪಟ್ಟು, ಬಂಗಾಳಕೊಲ್ಲಿಯಲ್ಲಿ ಬೀಳುವ ಇಡೀ ಪ್ರಕ್ರಿಯೆ 20-30 ನಿಮಿಷದಲ್ಲಿ ಮುಗಿದಿದೆ.
ರಾಕೆಟ್ ಗೆ 140 ಕೋಟಿ ರೂ. ವೆಚ್ಚವಾಗಿದ್ದರೆ, 'ಕೇರ್' ಸ್ಪೇಸ್ ಕ್ಯಾಪ್ಸೂಲ್ ಗೆ 15 ಕೋಟಿ ರೂ. ವೆಚ್ಚವಾಗಿದೆ.
ಇಸ್ರೋದ ಜಿ.ಎಸ್.ಎಲ್.ವಿ ಎಂ-3 ರಾಕೆಟ್ ಉಡಾವಣೆಯ ಹಿನ್ನೆಲೆಯಲ್ಲಿ ಪ್ರಧಾನಿ ನರೇಂದ್ರ ಮೋದಿ ಇಸ್ರೋದ ವಿಜ್ನಾನಿಗಳನ್ನು ಅಭಿನಂದಿಸಿದ್ದಾರೆ.