ಲೋಕಸಭಾ ಚುನಾವಣೆಯಲ್ಲಿ ಎರಡು ಅಂಕಿ ಸ್ಥಾನಗಳನ್ನು ದಾಟದೇ ಪ್ರತಿಪಕ್ಷ ಸ್ಥಾನವನ್ನೂ ಉಳಿಸಿಕೊಳ್ಳಲು ಅರ್ಹತೆ ಪಡೆಯದ ಕಾಂಗ್ರೆಸ್, ಪ್ರಧಾನಿ ನರೇಂದ್ರ ಮೋದಿ ಸಚಿವ ಸಂಪುಟ ಸದಸ್ಯೆ ಸ್ಮೃತಿ ಇರಾನಿ ಅವರ ವಿದ್ಯಾರ್ಹತೆಯನ್ನು ಧಾರಾಳವಾಗಿ ಪ್ರಶ್ನಿಸುತ್ತಿದೆ.

ಭಾರತಕ್ಕೆ ಸ್ವಾತಂತ್ರ್ಯ ಬಂದಾಗಿನಿಂದಲೂ ದೇಶವನ್ನು ಬಹುಕಾಲ ಆಳಿರುವ ಕಾಂಗ್ರೆಸ್ ನಲ್ಲಿ ಅಕ್ಷರಸ್ಥರಿದ್ದರೂ ಸಾಮಾನ್ಯಜ್ನಾನ, ಕನಿಷ್ಠ ತಿಳುವಳಿಕೆಯ ಕೊರತೆಯಿಂದ ಬಳಲುತ್ತಿದ್ದ ಕೆಲ ನಾಯಕರು ಸ್ವಹಿತಾಸಕ್ತಿಯ ಏಕೈಕ ಕಾರಣದಿಂದ ದೇಶದ ಹಿತಾಸಕ್ತಿಯನ್ನೇ ಬಲಿಕೊಟ್ಟು ಭಾರತದ ಅಭಿವೃದ್ಧಿಯನ್ನು ತಮ್ಮ ಬುದ್ಧಿಮಟ್ಟಕ್ಕಿಂತಲೂ ಕೆಳಮಟ್ಟಕ್ಕೆ ತಳ್ಳಿದ್ದು ಎಲ್ಲರಿಗೂ ತಿಳಿದೇ ಇದೆ. ನೆಹರು ಅವರಿಂದ ಹಿಡಿದು ಮನಮೋಹನ ಸಿಂಗ್ ತನಕ ಕಾಂಗ್ರೆಸ್ ಇತಿಹಾಸವನ್ನು ತಿರುವಿಹಾಕಿದರೆ ಅದೆಷ್ಟೋ ನಿರಕ್ಷರ ಕುಕ್ಷಿಗಳು ಕುಟುಂಬ ನಿಷ್ಠೆಯ ಅರ್ಹತೆ ಮಾತ್ರದಿಂದಲೇ ಆಯಕಟ್ಟಿನ ಸ್ಥಾನ ಅಲಂಕರಿಸಿದ್ದಿದೆ. ಪ್ರಪಂಚದಲ್ಲೇ ಅತ್ಯಂತ ವಿದ್ಯಾವಂತ ಪ್ರಧಾನಿ ಎಂಬ ಹಿರಿಮೆಗೆ ಪಾತ್ರರಾದ ಮನಮೋಹನರ ಆಢಳಿತ ಕಾಲದಲ್ಲಿ ಭಾರತ ಕಂಡಿದ್ದು ಪಾತಾಳವನ್ನೇ. ಡಿಗ್ರಿಯೊಂದೇ ಅರ್ಹತೆ ಎನ್ನುವುದಾದರೆ, ಮನಮೋಹನರ ಆಡಳಿತದಲ್ಲಿ ಭಾರತ ಇತಿಹಾಸದಲ್ಲೇ ಅತ್ಯಂತ ಉನ್ನತಿಯನ್ನು ಹೊಂದಬೇಕಾಗಿತ್ತು, ಆದದ್ದೇ ಬೇರೆ..

ಅಪರೂಪಕ್ಕೊಮ್ಮೆ ಎಚ್ಚೆತ್ತುಕೊಂಡಿರುವ ಭಾರತದ ನಾಗರಿಕ ಪ್ರಪಂಚ, ಗಟ್ಟಿ ನಾಯಕತ್ವಕ್ಕೆ ಸಂಪೂರ್ಣ ಬೆಂಬಲ ನೀಡಿ ದೇಶದ ಅಭಿವೃದ್ಧಿಗೆ ಸಹಾಯಕವಾಗುವ ನಿಟ್ಟಿನಲ್ಲಿ ಐತಿಹಾಸಿಕ ತೀರ್ಪು ನೀಡಿದೆ. ವಿದ್ಯಾರ್ಹತೆ ಇಲ್ಲದೇ ಇದ್ದರೂ ಜನರ ನಾಡಿಮಿಡಿತ ಅರಿತ ಸಂವೇದನಾಶೀಲ ವ್ಯಕ್ತಿತ್ವಕ್ಕೆ ದೇಶ ಅಭಿವೃದ್ಧಿಗೊಳಿಸುವ ಸದಾವಕಾಶ ದೊರೆತಿದೆ. ಭಾರತ ಕಂಡ ಶ್ರೇಷ್ಠ ಕ್ರಿಕೆಟಿಗ ಸಚಿನ್ ತೆಂಡೂಲ್ಕರ್ ವಿದ್ಯಾರ್ಹತೆ 10ನೇ ತರಗತಿ, ಆದರೆ ಕಾಂಗ್ರೆಸ್ ನವರೇ ಅವರನ್ನು ಆದರಿಸಿ ರಾಜ್ಯ ಸಭಾ ಸ್ಥಾನ, ಭಾರತ ರತ್ನ ನೀಡಿದ್ದಾರೆ. ಪ್ರಮಾಣಪತ್ರದ ಮೂಲಕ ಬೆಳಕಿಗೆ ಬಾರದ ಅದೆಷ್ಟೋ ಪ್ರತಿಭೆಗಳು ಕಾರ್ಯವೈಖರಿಯಿಂದ ಸಾರ್ವಜನಿಕ ವಲಯದಲ್ಲಿ ತಾವು ಮಾಡಿರುವ ಉತ್ತಮ ಕೆಲಸಗಳಿಂದ ಇಂದಿಗೂ ಜನಪ್ರಿಯವಾಗಿವೆ.

ಕಾಂಗ್ರೆಸ್ ಸೇರಿದಂತೆ ಕೆಲವು ಪಕ್ಷಗಳ 'ವಿದ್ಯಾವಂತ' ಎನಿಸಿಕೊಂಡ ನಾಯಕರು ಸಾರ್ವಜನಿಕ ಘನತೆಯನ್ನೇ ಮೀರಿ ತಮ್ಮ ವಿರೋಧಿಗಳನ್ನು ಹಳಿಯುವುದನ್ನು ನೋಡಿದರೆ, ದೇಶ ಸೇವೆಗೆ ಟೊಂಕಕಟ್ಟಿ ನಿಂತ ನಾಯಕರಿಗೆ ಕೇವಲ ಉಚ್ಚ ಡಿಗ್ರಿಗಳು, ಸರ್ಟಿಫಿಕೇಟುಗಳು ಇದ್ದರೆ ಸಾಕೆ, ಅಥವಾ, ದೇಶದ, ಜನತೆಯ ಅಭಿವೃದ್ಧಿಗಾಗಿ, ಕಳಕಳಿ, ಭಕ್ತಿ, ಸಂವೇದನೆ, ನಿಷ್ಠೆ ಹಾಗೂ ಆಢಳಿತ ದಕ್ಷತೆ ಮತ್ತು ಎಲ್ಲಕ್ಕಿಂತ ಮಿಗಿಲಾಗಿ ಸಾಮನ್ಯ ಜ್ನಾನ (ಕಾಮನ್ ಸೆನ್ಸ್) ಇತ್ಯಾದಿಗಳು ಹೆಚ್ಚು ಅಗತ್ಯ ಅನಿಸುತ್ತದೆಯೆ?..

ಸ್ವಪ್ರಯತ್ನ, ಛಲ ಹಾಗೂ ಕಠಿಣಶ್ರಮದಿಂದ ರಾಜಕೀಯ ಜೀವನದಲ್ಲಿ ಮೇಲೆಬಂದ ಸ್ಮೃತಿ ಇರಾನಿ ಅವರಿಗೆ ಉನ್ನತ ವಿದ್ಯಾರ್ಹತೆ ಇಲ್ಲ, ಹಾಗಾಗಿ ಅವರು ಮಂತ್ರಿ ಹುದ್ದೆಗೆ ಅನರ್ಹ ಎಂಬ ಕಾಂಗ್ರೆಸ್ಸಿಗರ ವಾದ ಎಷ್ಟರ ಮಟ್ಟಿಗೆ ಸರಿ?, ಜನ ಸೇವೆ ಮಾಡಲು ಉನ್ನತ ವಿದ್ಯಾರ್ಹತೆ ಅನಿವಾರ್ಯವೇ?. ನಿಮ್ಮ ಅಭಿಪ್ರಾಯವೇನು?..