ಕಾಂಗ್ರೆಸ್ ಸರ್ಕಾರ ಎ.ಸಿ.ರೆಸ್ಟೋರೆಂಟ್ ಗಳ ಮೇಲೆ ಹೊರಿಸಿರುವ ತೆರಿಗೆಯನ್ನು ವಿರೋಧಿಸಿ ಮುಂಬೈಯಲ್ಲಿರುವ ’ಅದಿತಿ’ ವೆಜ್ ರೆಸ್ಟೋರೆಂಟ್‌ ನ ಮಾಲೀಕ ಶ್ರೀನಿವಾಸ್ ಶೆಟ್ಟಿ ತಮ್ಮ ರೆಸ್ಟೋರೆಂಟ್‌ ನಲ್ಲಿ ಗ್ರಾಹಕರಿಗೆ ನೀಡಲಾಗುವ ಬಿಲ್‌ ನಲ್ಲಿ ಯುಪಿಎ ಸರ್ಕಾರದ ವಿರುದ್ಧ ಟೀಕಾಪ್ರಹಾರ ಮಾಡಿರುವ ಟಿಪ್ಪಣಿಯೊಂದನ್ನು ಮುದ್ರಿಸಿದ್ದರು. ಈ ಹಿನ್ನೆಲೆಯಲ್ಲಿ ರೊಚ್ಚಿಗೆದ್ದಿರುವ ಕಾಂಗ್ರೆಸ್ ಕಾರ್ಯಕರ್ತರು, ರೆಸ್ಟೋರೆಂಟ್ ಮಾಲೀಕರು ಕ್ಷಮೆ ಕೋರಬೇಕು ಎಂದು ಆಗ್ರಹಿಸಿ ಪ್ರತಿಭಟನೆ ನಡೆಸಿದ್ದಾರೆ.

'ಯುಪಿಎ ಸರ್ಕಾರದ ಪ್ರಕಾರ, ಹಣ (2ಜಿ, ಕಲ್ಲಿದ್ದಲು, ಕಾಮನ್‌ವೆಲ್ತ್ ಗೇಮ್ ಹಗರಣ) ಕೊಳ್ಳೆಹೊಡೆಯುವುದು ಅನಿವಾರ್ಯ, ಆದರೆ ಎ.ಸಿ ರೆಸ್ಟೋರೆಂಟ್‌ ನಲ್ಲಿ ತಿಂಡಿ ತಿನ್ನುವುದು ವಿಲಾಸಿತನ' ಎಂದು ಬಿಲ್ ಮೇಲೆ ಮುದ್ರಿಸಲಾಗಿತ್ತು. ಈ ಹಿನ್ನೆಲೆಯಲ್ಲಿ ಮುಂಬೈ ಕಾಂಗ್ರೆಸ್ ಕಾರ್ಯಕರ್ತರು ಪ್ರತಿಭತಿಸಿ ಅದಿತಿ ವೆಜ್ ರೆಸ್ಟೋರೆಂಟ್‌ನ್ನು ಸೋಮವಾರ ಬಂದ್ ಮಾಡಿಸಿದ್ದರು.

ಇಷ್ಟೇ ಅಲ್ಲದೇ ಭಾರತೀಯ ದಂಡ ಸಂಹಿತೆಯ ಪರಿಚ್ಛೇದ 501ರ ಪ್ರಕಾರ ರೆಸ್ಟೋರೆಂಟ್ ಮಾಲೀಕರ ವಿರುದ್ಧ ಮಾನನಷ್ಟ ಮೊಕದ್ದಮೆ ಹೂಡಲಾಗಿದೆ. ಪ್ರತಿಭಟನೆ ನಡೆದು ಒಂದು ದಿನದ ನಂತರ ಅಂದರೆ, ಜು.23ರಂದು ರೆಸ್ಟೋರೆಂಟ್ ಪುನಾರಂಭಗೊಂಡಿದ್ದು ಬಿಲ್‌ ನಲ್ಲಿರುವ ಟೀಕೆ-ಟಿಪ್ಪಣಿ ಮುಂದುವರೆದಿದೆ.

ದೇಶವನ್ನೇ ವಿನಾಶದಂಚಿಗೆ ಕೊಂಡೊಯ್ಯುತ್ತಿರುವ ಭ್ರಷ್ಠಾಚಾರದ ಬಗ್ಗೆ ವಿರೋಧ ವ್ಯಕ್ತಪಡಿಸುವುದೂ ಕೂಡಾ ಅಪರಾಧವೇ ? ಈ ಬಗ್ಗೆ ನಿಮ್ಮ ಅಭಿಪ್ರಾಯ ಹಂಚಿಕೊಳ್ಳಲು ನಿಮಗಿದೋ ಅಹ್ವಾನ..