ಹೂವಿನ ವಾಸನೆ ಕಾಸಿನ ಝಣ ಝಣ
ಘಮ ಘಮ ವಾಸನೆ ಮೈಸೂರು ಮಲ್ಲಿಗೆ
ಬೇಕೆ ಬೇಕೆ ತಕ್ಕೊಳ್ಳಿ
ಕೂಗುತ ಬಂದನು ಟೋಪೀವಾಲ
ಹೂವಿನ ಗಾಡಿಯ ತಾ ತಳ್ಳಿ
ಆಟದ ಬಯಲಿಗೆ ಆಡಲು ಹೊರಟ
ಬಾಲುವು ಅದನು ನೋಡಿ
ಮಲ್ಲಿಗೆಯನ್ನು ಮೆಲ್ಲಗೆ ಎತ್ತಿ
ವಾಸನೆ ಸವಿದನು ಮೂಸಿ
ಹಾಗೇ ಮುಂದಕೆ ಹೋಗುತ್ತಿರಲು
ಕರೆದನು ಕೂಗಿ ಹೂಗಾರ
ವಾಸನೆ ಸವಿದೆ ಕಾಸನು ನೀಡೈ
ಎಂದನು ಮಾಡಿ ತಕರಾರ
ಬಾಲುವು ಮರಳಿ ಬಂದನು ಬಳಿಗೆ
ಕಿಸೆಯಾ ಝಣ ಝಣ ರೊಕ್ಕವನು
ಬಡಿಯುತ ಸದ್ದನು ಮಾಡುತ ನುಡಿದನು
ಕೇಳೈ ರೊಕ್ಕದ ಶಬ್ದವನು
ಸವಿದಿಹ ವಾಸನೆಗಾಯಿತು ರೊಕ್ಕದ
ಝಣ ಝಣ ಶಬ್ದವ ನೀ ಕೇಳು
ಲೆಕ್ಖವು ಚುಕ್ತಾ ಆಯಿತು ಅಲ್ಲಿಗೆ
ಎನ್ನುತ ನಡೆದನು ಭಲೆ! ಬಾಲು!!
By : ವನರಾಗ ಶರ್ಮಾ
Share :